WASHINGTON D.C., Merca – E ex alcalde di New York, Rudy Giuliani a surgi como e principal candidato cu e presidente electo di Merca, Donald Trump, ta considerando pa e cargo di Secretario di Estado, un fuente familiarisa cu e situacion a bisa dialuna.
E fuente a bisa cu John Bolton, kende a desempeña como embahador di Merca den Nacionnan Uni durante e gobierno di George W. Bush, tambe a wordo considera pa encabesa e Departamento di Estado.
Giuliani, di 72 aña, tabata un di e partidarionan mas energico y di alto perifl durante e campaña electoral di Trump y cu frecuencia a presenta durante e eventonan cu fuerte atake contra e democrata Hillary Clinton.
Giuliani tabata alcalde di New York durante e atakenan di 11 di September 2001 y a lidera e ciudad durante e crisis despues di e destruccion di e Twin Towers di World Trade Center, un estrecha colaboracion cu e presidente di e tempo ey, George W. Bush.
E ex alcalde tabata un di e prome partidarionan di Trump, e tabata su amigo desde hopi aña y a defende di e diverso controversianan cu e tabata envolvi durante e campaña.
Giuliani a acusa Clinton repetidamente di a viola e ley pa su maneho di informacion clasifica atrabes di un server di email priva mientras e tabata secretaria di estado for di 2009 pa 2013.
“Si Rudy kier, e lo hay’e,” ex presidente di e Camara di Representante, Newt Gingrich, a bisa durante e programa “The Kelly File” di e cadena Fox News.
Fuente: Reuters