Despues cu na aña 2012 a cuminsa cu e proyecto di praktijk ondersteuning pa algun dokter di cas, awe mester bay cuminsa amplia esaki, mirando e interes cu tin pa e servicio aki, segun Gino Goeloe, director di Wit Gele Kruis Aruba.
E ta comenta cu a sinta cu HAVA y AZV y a bay papia riba con por mehora e servicio na e dokternan di cas. E dokternan di cas hopi biaha nan ta druk y no tin mucho tempo pa guia e pashentnan cronico. Ta papia di diabetes, hendenan cu ta sufri di presion halto, hendenan cu tin asma y hendenan cu tin problema cu nan niernan. E ora ey a bin cu un enfermera academico, esta un HBO’er, cu hopi experiencia y e ora ey a bisa pa wak si por pone banda di e dokter di cas, pa yuda e pashentnan cronico. Tin cu bisa cu a cuminsa na 2012 cu un proyecto piloto y ya caba a wak e frutanan. A wak un dokter di cas cu un praktijk ondersteuner, e pashentnan ta mas miho educa riba nan malesa, nan ta mas conciente di kico si y kico no nan mester come y tambe nan uzo di remedi a baha y nan ta baha di peso tambe. Esey ta nifica cu a mira cu berdaderamente e praktijk ondersteuner a yuda e dokter di cas tambe, pasobra e ora ey e dokter di cas tin mas tempo pa su pashentnan di emergencia, cu dolor, cu no tin splicacion p’e. E ora ey e dokter di cas por samina e pashent mas miho y tin mas tempo. Pesey awor aki e praktijk ondersteuner a duna su fruto cu por mira cu e consumo di remedi a baha, e personanan aki a baha di peso, e personanan aki no ta wordo manda na e specialistanan, esta tweede lijn y di cual Wit Gele Kruis ta contento cune. Ya eynan caba cu si yega na e specialista caba, ya bo ta laat. Ban cuminsa cuida nos hendenan na e dokter di cas. E praktijk ondersteuner a bira un coach di e persona, pasobra e praktijk ondersteuner, nan ta comunica cu e pashentnan, ora cu nan ta bay haci compras, nan ta saca potret di e comestible cu nan kier come, mande pa e praktijk ondersteuner y ta gui’e den esaki. E praktijk ondersteuner a bira un coach pa e pashentnan.
A puntra Goeloe kico ta e trabou di e praktijk ondersteuner pa cual aki e ta splica kico ta e tol di e persona aki pa e dokternan di cas.
E practica pa e dokter ta tuma tempo pa atende e pashent. No ta regularmente ta haya un pildo di un dokter y ta bin despues di un luna of dos. Cerca e praktijk ondersteuner, e pashent ta bin tur siman pa check e signonan vital manera presion, sucu y asina por keda bay. Un diabetico, tin menos gevoel den nan pia. Tambe nan ta check entre e tenchinan si tin herida, bao di e pia si tin herida. E praktijk ondersteuner ta algo cu sigur Aruba mester ta contento cu awor aki tin seis, pero a caba di tuma 7 mas cu ta bay bira e ora total 13 praktijk ondersteuner pa Aruba y cada praktijk ondersteuner ta bay traha pa dos practica di dokter di cas. Esey ta algo cu prome tabata un pa tres dokter, pero a bisa cu no. Pa por haci un pa dos praktijk di dokter di cas, cual un praktijk di un dokter por tin 2000 pa 2500 pashent y parti den dos. E ora sa cu tin miho guia pa e pashentnan aki tambe, segun Goeloe.
Segun Goeloe, normalmente mester tin 2500 pashent maximo pa dokter di cas, cu tin un bista mas rasonabel riba e practica. Ta bay pa tin como dokter di cas, mester sa ken ta e pashentnan y kico nan tin y tambe pa por guia nan den e miho manera, segun Goeloe.