Temporada di horcan a cuminsa na Juni y e ta caba den November. Ta e temporada mas calor cu tin aki na Aruba. Semper Wit Gele Kruis ta bisa cu e temporada aki tin cu cuida nos curpa extra. Sigur e personanan cu ta sufri di presion halto. Pesey mes semper a bisa cu si bo ta un persona grandi cu ta haci trabao di cas, cushina den oranan di merdia, den e caso aki entre 12’or y 1’or, of di 2’or, por fabor, cushina of parti mainta, of anochi. Tambe si bo ta haci e trabao di cas, tambe haci’e por fabor parti mainta of parti atardi, ora cu solo baha. Pasobra loke ta pasa ta, cu un solo, e cayente y e calor cu tin actualmente, ta hisa bo presion. Ora e hisa bo presion, por haya ataca di curason of un stroke. Pesey Wit Gele Kruis ta bisa semper den e temporada aki, wak pa bo no haci cosnan den oranan di merdia, den e caso aki, si bo ta haci gym of bo ta cana, tampoco no haci’e den e calor aki. Semper ta bisa cu si haya remedi di presion, corda bebe bo remedi, pasobra tin hopi persona cu conoce, ciudadanonan, pashentnan tambe, cu nan ta haya remedi pa presion, pero no ta bebe. Loke ta pasa e ora ey, vooral den e temporada calor aki, bo presion ta subi diripente. Ora e subi diripente, bo por haya un ataca di curason of un stroke tambe diripente. Esey ta locual cu ta wak tambe actualmente cu ta pasando na Aruba.
Tin casonan cu Wit Gele Kruis a experencia, ta personanan di edad relativamente hoben, ta muriendo. Tin ta muriendo na pia di trabao. Otro ta muri na hospital, otro ta muri na cas, pa motibo cu tin casonan cu sa cu e personanan aki no a tuma nan remedi cu nan mester tuma. Pesey pueblo, pashentnan, tur hende mester tuma nan pildo di presion, sigur den e temporada aki. Ora bo tin presion, bo mester bebe bo pildo tur dia, no ta algo di awe si, awe no, weekend no. Tur dia e mester wordo bebi. E ta un malesa cronico. Bo tin cu uza bo pildo pa baha bo presion. Si bo no uz’e, tambe tin consecuencia cu bo niernan por wordo afecta, cu bo bira hasta un dialyse pashent. Esey ta hopi hende no sa cu por bira un dialyse pashent, si bo keda sin tuma bo remedinan di presion. Pesey Wit Gele Kruis ta pone atencion pa esey. Tambe un cos cu semper ta bisa, cu mester biba un bida saludabel. Esey ta nifica cana mey ora pa dia, esey kiermen, bebe 8 glas di awa pa dia. Sa cu nos hendenan no gusta bebe awa. Nos gusta bebe juice, softdrink, tur likido cu hopi sucu.
Tin un triki, segun Goeloe. Pone den boso glas di awa, corta lamunchi, corta apelsina, tir’e den e glas di awa of den e canika di awa. E ta haya un smaak, e ora bo ta bebe. Esey ta algo cu Goeloe ta haci personalmente. Bebemento di awa no ta bay facil. Pero si bo pone un apelsina corta, un lamunchi corta, pida appel sin sucu, bo ta bebe pasobra e tin un smaak toch dushi, pero e ta saludabel, segun Goeloe.
Sucu tambe dimas tampoco no ta bon pa nos curpa. Tambe si bo ta huma, den e caso aki, cuminsa baha man te ora bo stop di huma.