Sra Gina Maduro di Sindicato ABV a tuma nota di e comunicado manda door di ATIA unda nan ta pidi sindicato nan pa duna respet na dunado nan di trabao. E respet mester bin mutuo, prome cu exigi respet mester respeta e sindicato. E problema cu a cuminsa na Hospital a sosode durante cu ABV tawata eherciendo su trabao sindical, e director di Patienten Zorg a menasa e vice presidente dilanti 7 otro persona cu a wordo retira. Esey ta comienso di tur e problema di Sindicato den Hospital, paso ta pa hopi tempo caba a wordo stroba pa haci trabao sindical. No ta facil pa unda bo ta sindicato y trahado, bo tin dos pechi. Unda e dunado di trabao ta purba di kibra e sindicato, dividi e sindicato y dividi e miembro nan. Esey ta maneho dictatorial cu ta pasando actual na Hospital y ta pasando na e otro compania nan tambe. Sra. Maduro ta papiando di e caso di sindicato, ta basta cu menasa, intimidacion, palabra nan indirecto aunke e biaha aki si tawata directo.
Si ATIA pone su mes na nos luga como sindicato, bo tin di respeta bo dunado di trabao. Si bo tin di tene cuenta cu ora bo tin pechi di sindicato bo ta gelijkspartner, esey hopi dunado no por cun’e. Ora mi ta un trahado y abo ta mi hefe hopi biaha e ta recorda hende cu e ta hefe. Ora bo ta sindicalista bo ta haci bo trabao sindical e ora nos ta gelijkspartner mester tin respet mutuo. Esey ta laga hopi di desea di dunado nan di trabao.
Sra. Maduro ta splica cu hopi sindicato tin di lucha y demostra pa kico nan ta existi, ya cu aki na Aruba hopi hende ta contra sindicato. Hopi ta parti di Union Sindical Arubano. Hopi cu tin e puesto di dobel pechi ta ripara cu e respet no t’ey mas y ta purba di kibra e sindicato. Sindicato nan mas grandi mes ta haya dificultad compara cu esnan den sector priva. Pesey Sra. Maduro kiermen cu mester proteha sindicato. Trahado tin derecho di afilia na un sindicato. Derecho di existencia door di representa su miembro nan. No por ta asina cu durante cu bo ta eherciendo bo trabao sindical pa scapa e trahado bo ta wordo menasa. Tin di proteha e trahado. E problema na Hospital ta hire of fire segun Sra. Maduro.