Increibel pa mira despues cu no a construi ni un scol y cu kier a privatisa educacion, uzando e ruta cuestionabel di PPP-proyectonan, un aña prome cu eleccion e politiconan tradicional kier bende nos hobennan e mesun storia bieu di semper, cu nos futuro a wordo sigura cu e apertura di e ‘Mehorador’. Desde cu Lago Oil a bandona Aruba, tur gobierno a gaña pueblo cu e operador nobo di e refineria lo percura pa hopi inversion y cu lo bin un centro di educacion. Ningun di e operadornan a cumpli cu e promesanan haci, mientras nan tur tabata disfruta di diferente areglonan fiscal miyonario, otorga pa e politiconan tradicional. Pa haci e situacion mas pio, e operadornan tambe tabata un di e promotornan principal di e fenomeno di discriminacion di salario y ‘Cheap Labor’. Atencion pa inverti realmente den e pais y e hoben, tabata un mentira.
Awor atrobe pueblo por scucha tur miembro di parlamento cu a vota ‘VOOR’ pa REDOBLA E MEGA DEBE cu e apertura di e ‘Mehorador’, sin cu nan tabata sa tur detaye, bin cu e mesun cantaleta di inversion den educacion. Hasta esunnan cu ta educador di profesion, tambe kier gaña nos hobennan cu e mesun mentira gasta y bieu. Di berdad e maestronan politico ta kere cu tur hobennan na Aruba ta asina bobo, ciego of asina facil pa manipula?
No ta tur hoben, a bira adicto na cos y tampoco na fiesta. No ta tur hoben, ta acepta cu e politiconan tradicional sigui destrui y entrega e isla aki. No ta tur hoben, tin miedo di e politiconan tradicional. Den e 30 aña di Status Aparte, e unico cosnan palpabel di ‘logro’ cu nos hobennan por mira, ta cu e politico tradicional a crea un MEGA DEBE y nan tur si a bira miyonario.
Gobierno ta kere fielmente cu e por saca Aruba for di su abismo financiero, door di gasta mas biyones na ‘Klinkers’, ‘Black Corridor’ y ‘Mehorador’. Gobierno ta kere cu ofrece pueblo tur sorto di fiesta, cu ningun hende lo ripara cu esakinan ta pa tapa e realidad amargo. Aruba no por ta ‘One Happy Island’, si no tin suficiente trabou of un perspectiva riba un trabou duradero y bon paga. Unda tur dia e pueblo no ta sinti su mes sigur of respeta mas riba su propio isla natal. Of unda e hoben tin cu paga minimal 25 aña largo, pa kisas e SUPER MEGA DEBE wordo reduci te na 40%. Esaki no ta bon gobernacion den ningun sentido. Esaki ta un abuso y crimen contra e futuro generacionnan.
Pues si gobierno, sostene pa tur e parlamentarionan cu a vota ‘VOOR’ pa haya un pida di e cabay di campaña ‘Mehorador’ ta kere cu ofreciendo pueblo un otro fiesta, bou e mentira di porfin Aruba ta doño di su refineria y productonan petrolero, pa no mira cu esaki tabata un decision anti-pueblo, anto e ta bon ekiboca. Tuma debenan biyonario riba lomba di pueblo y exonera companianan di miyones pa haya algun miyon di entrada, no ta logico y nada pa ta orguyoso di dje. Esaki ta atrobe tuma pueblo haci cu un orguyo falso, mientras cu keto bay e meta tabata pa enrikece e grupito privilegia cu a haci Aruba bancarota.
Y e grandioso fiesta di celebracion di diasabra proximo cu Refineria di Aruba (RDA, cu oficialmente ainda ta den ‘oprichting’) ta organisa, ta nada mas cu e Minister di Energia kier mustra e Minister di Turismo, cu a uza carnaval pa bira popular, cu awor e tambe tin su ‘RDA-Bank’, maneha pa e rivalnan carnavalesco di antes di e Minister di Turismo. Asina e tambe por ofrece pueblo di San Nicolas awor tur sorto di fiesta y sin control di parlamento. E Minister di Energia ta laga su colega di Turismo mira publicamente cu loke e por, e tambe por y alabes ta lag’e sa cu (supuestamente) e bario di San Nicolas ta politicamente di dje y keda afo. Pues e guera entre ‘ATA-Bank’ y ‘RDA-Bank’ a cuminsa riba lomba di e hobennan, y e politiconan tradicional ta kere cu tur hoben ta asina bobo, cu e no por mira realmente kico ta pasando. Hallooo politico tradicional, no ta tur hoben ta bobo, ciego of adicto na fiesta!