Pa basta tempo caba trahadonan ariba waf, trahadonan di ASTEC ta sinti molester di e huma cu ta sali for di WEB. Diamars atrobe tabata tin un accion riba waf, door di e huma.
Containernan no tabata por a sali, trahadonan di ASTEC a pone trabao abao y tur cos a keda pega. Sr. Gigi Helder ta splica mas riba e situacion aki.
Sr. Helder a splica cu tur ora tin problema cu e huma. Esaki ta debi na e calidad di fuel oil cu ta wordo kima door di WEB, su porcentahe ta mucho halto. Ora cu e huma bin abao, ta masha hopi problema esaki ta trece pa esunnan cu ta traha ariba waf.
E problema mester di solucion. Tur hende mester sinta na mesa, pa asina soluciona tur cos debidamente. Containernan no ta sali y e gastonan di parti di APA y ASTEC nan no ta pordona. Nan ta sigui cobra.
Si no tin solucion, e liñanan di barco cu actualmente ta bin Aruba, dado momento nan ta fada cu cada biaha tin problema riba waf. Por yega e dia cu nan ta dicidi cu nan ta bay Corsou y no ta bin Aruba mas.
Esaki lo trece cun’e cu problemanan hopi mas grandi y ta mas leu for di cas. A reuni cu ASTEC, pero mester busca un manera pa soluciona e problema aki tambe, segun Sr. Gigi Helder.