WASHINGTON, D.C., Merca- Representantenan di Sillicon Valley a asisti na un audiencia den congreso Mericano riba e funcionamento y siguridad di nan plataforma.
Representantenan di e gigante tecnlogico Facebook, Google y Twitter no por a contesta, di un manera concreto, e pregunta directo di e parlamentario Republicano Louie Gohmert riba si e companianan lo a detecta actividadnan di otro paisnan, apart di Rusia, cu e presunto fin di mete den e ultimo eleccionnan presidencial.
E representantenan di e companianan aki diamars tabata presente den e House of Representatives pa testifica dilanti e Comite Judicial riba su esfuersonan pa contraresta e mal uzo di nan plataforma. Gohmert a sugeri cu otro paisnan manera China y Noord- Korea lo por a realisa accionnan similar di locual Rusia ta wordo acusa di dje, y a insisti cu lo ofrece detayenan pa cu esaki.
Tur di nan a purba evita di contesta e pregunta cu contestanan generalisa y contestanan no claro riba e constante atakenan di actornan malicioso di rond mundo y nan esfuerso pa defende nan mes. “Mi ta puntrando specificamente si algun di e paisnan aki, ademas di Rusia a uza boso plataforma di manera indebido, e contesta lo mester ta un si of un no”, Gohmert a bisa Monika Bickert, representante di Facebook. Sin embargo, Bickert no tabata capas di duna un contesta cla, mescos cu Juniper Downs di Google y Nick Pickels di Twitter.
“Esey kiermen cu boso a bin prepara pa yuda e democratanan pa acusa Rusia, pero no por señala niun otro pais, toch?” Gohmert a puntra, y el a agrega cu tur tres tabata hopi bon den “evita e pregunta y nenga na contesta esaki”, según e portal Breitbart.
Inteligencia Mericano ta acusa Rusia di mete den e eleccionnan presidencial di 2016 cu e uzo di varios metodo, particularmente a trabes di rednan social, algo cu Moscu a bin ta nenga na mas di un ocasión. E siman aki, presidente Ruso, Vladimir Putin, a reitera e posicion di su pais riba e supuesto interferencia Ruso den e eleccionnan, yamando esakinan di ridiculo.