Recientemente Aruba Triathlon Association a organisa e evento di Sprint Triathlon na Boca Catalina. Despues di a organisa e Duathlon Nacional, e federacion di triatlon Arubano, ATA a organisa un otro tremendo evento pa nan tri-atletanan e biaha aki e Guardian Group Sprint Triathlon. E evento di Sprint Triathlon a inicia pa 7’or di mainta cu un participacion grandi di tri-atletanan den tur edad. E evento di Sprint Triathlon lo ta uno veloz mirando e distancianan cortico cu tin cu wordo recori pero mas cu claro e intensidad lo ta uno halto. Pa loke ta e participacion e categorianan tabata den Super Sprint(Kids te cu 14 aña) unda a landa 375 meter, core bicicleta 10 kilometer y finalisa cu 2.5 kilometer core na pia. Den e categoria di Sprint, e distancianan tabata un tiki mas largo. Aki cada atleta mester a landa un total di 750 meter, core bicicleta pa 20 km y finalisa e competencia cu un 5 km careda na pia. Por ultimo den e categoria Female Open 15+, e tri-atletanan femenino mester a landa 750 m, despues core bicicleta un total di 20 km y finalisa nan careda na pia cu un recorido di 5 km. Pa loke ta e resultado final, mester bisa cu e hoben prospecto Giannon Eights a logra triunfa den e categoria masculino, mientras Janella Vlaun a triunfa den e categoria femenino. Stichting Sportsubsidie Aruba ta contento di por aporta y brinda e ayudo na e federacion di triathlon cu ta organisa caredanan di triathlon, duathlon y aquathlon pa nan miembro y no
miembronan na Aruba. Lotto, e loteria di Aruba ta ofrece diferente weganan manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan
na e Stichting Sportsubsidie Aruba.