Kralendijk – Resientement gezaghebber Edison Rijna, akompañá pa dos di su kolaboradónan di gabinete, tabata di bishita na ofisina di Direktorado di Supervishon i Mantenshon di Lei pa sera konosí mas djaserka ku e direktorado, su direktor nobo sr. Jair Tromp i su empleadonan. Gezaghebber Rijna tin e portofolio di órden públiko i siguridat bou di dje. Tabata un enkuentro habrí i positivo kaminda hopi tópiko a bini dilanti i kaminda e empleadonan tabatin hopi oportunidat pa hasi pregunta. A papia entre otro tokante deskripshon di tarea klarito, koperashon na momentu di realisashon di tarea por ehèmpel ku Kuerpo Polisial Hulanda Karibense, yenamentu di vakatura, integridat, kon e organisashon ta hinká den otro i posibel kambionan den esei komo konsekuensia di análisis a base di e akuerdo intergubernamental.