Un e-mail a revela recientemente muestra cu e ex-prome minister di Corsou, Gerrit Schotte, tabata envolvi como consehero di Fundashon Kas Popular (FKP), e asociacion di Vivienda na Corsou, esaki segun Curacao.nu.
E e-mail ta gradici Schotte pa su “conocemento, habilidad y determinacion”, pa cual supuestamente a ricibi 8 mil florin pa luna.
E noticia aki ta pone un situacion dificil p’e minister Charles Cooper, amigo di Schotte, cu anteriormente a nenga di ta na altura di e envolvimento di Schotte den FKP.
Parlamentario Ana Maria Pauletta a critica minister Coopera duramente, afirmando cu e tabata sa di e papel di Schotte den e asociacion di vivienda.
INTERVENCION
E ta referi n’e preguntanan anterior na Minister Charles Cooper, riba e supuesto colaboracion di Schotte cu FKP como consultant. Ta destaca cu Cooper y Arthur Con di FKP a declara un momento cu Schotte no ta consultant y no ta participa den FKP ni den proyecto den Rif y otro zona.
Ta aproximadamente un aña pasa a publica potret di Schotte hunto cu Rudney Garmers, ex-parlamentario di MFK y otro den e zona di Rif, caminda cu e casnan di FKP ta ubica.
Tambe a anuncia cu FKP a firma un “letter of intend” cu e empresa di Garmers, HD&M Urban Village Management, p’e benta di propiedad di FKP.
Esaki a haci cu e fraccion di PAR a pidi un reunion pa compronde ki di special e zona di Rif/Otrabanda tin y pakico tin interes pa adkiri monumento determina eynan.
MI CASA
Tambe tin rumor cu Schotte lo ta envolvi den e proyecto Mi Casa como intermediario. FKP a presenta recientemente un reclamacion na Giro Settlement Holding pa e diesnuebe miyon florin cu ainda debe nan. Esaki a trece duda den parlamento riba e intencionnan di FKP di recupera nan placa bek, incluyendo uzo di un agencia di Incasso.
N’e pregunta aki, director di FKP, Arthur Con, a responde cu no t’asina. A haci e preguntanan debi n’e rumornan cu e Incasso Bureau tambe tabata envolvi cu Schotte.
INTEGRIDAD
E revelacion aki ta trece duda riba e transparencia y integridad dentro di gobierno y di e asociacion di vivienda FKP. Specialmente p’e relacion entre minister Cooper y e compañero di partido Gerrit Schotte y e ex-parlamentario di MFK Rudney Garmers.
Segun Pauletta, e e-mail a indica cu Cooper a gaña parlamento intencionalmente pa beneficia e miembronan di su partido MFK.