Presidente di sindicato STA, sr Diego de Cuba a splica di un caso lamentabel di gerencia di Alhambra Casino kendenan a purba di cumpra e trahadornan pa no laga e sindicato representa nan.
De Cuba ta sigui splica cu gerencia di Alhambra Casino ayera, dia 16 di November pa trata e contracto colectivo cu a entrega na nan desde Mei 2016. A ricibi un contraproposicion di nan na Juli, pero e trahadonan a opta pa mantene na e proposicion cu STA a entrega na Mei y ta esey a trece dilanti ayera den un reunion cu a solicita cu gerencia. E pida frustrante ta cu tin un señora cu tin cu bin di afo y e tin di negosha y ta trece un retraso basta grandi den e negociacionnan. Ayera a sosode algo cu STA ta lamenta masha hopi mes y a bisa esey bon cla tambe, cu na momento cu a pidi un schorsing di e reunion, Gerencia di Alhambra a concede tambe, pero net ora cu ta bay saliendo, e secretaria di STA a bay dilanti y e delegadonan ta bin di patras y e dama aki a trata di intimida y cumpra e delegadonan y e delegadonan a core cu ne. Nan a bisa cu nan ta representa e empleadonan y nan no lo haci esey. Despues di e schorsing a bin paden y a habraca nan for di otro, vooral e dama aki, a bisa cu e tipo di intimidacionnan aki na Aruba no ta wordo acepta. Si na Merca e kier bay den e practicanan aki, e por wel di haci’e. Pero na Aruba no ta acepta e cosnan aki y a dal’e basta duro riba su dedenan pa e compronde cu asina aki no a sistema pa negosha. Ta negoshando un contracto colectivo y na mes momento ta purba di cumpra e delegadonan. Ta bon mes cu e delegadonan y tur e delegadonan di e companianan cu STA ta representa, ta hendenan para den nan sapato y no ta acepta e cos aki, de Cuba a splica.