Tin un plan pa cuminsa drenta mas den barionan pa hinca nos muchanan mas den deporte, pasobra esaki ta algo importante pa haci segun, presidente di Aruba Sport Unie, Gerald Franca.
E problema ta cu tin cu haya colaboracion y e inversion. E colaboracion ta e parti caminda cu ta propone na Gobierno pa trahado, empleado of ambtenaarnan cu ta envolvi den deporte, cu ta activamente den deporte como coach of trainer pa haya dos dia pa siman liber merdia. E merdia aki nan ta uz’e pa bay den veld, atende e muchanan den e diferente barionan. E ta un posibilidad cu ta bisa cu realmente por cubri e necesidadnan cu ta existi, pasobra en berdad tin hopi facilidad. Tin un otro propuesta cu a bay aden, pa e facilidadnan ta disponibel durante di ora di scol y despues di esaki nan ta disponibel pa e federacionnan, pa e muchanan te cu 6’or di atardi gratis. Idea ta pa bin cu mas movecion. Ta berdad cu e federacionnan ta traha a base voluntario y ta dificil pa impone riba nan, pasobra nan ta haci’e riba trabao voluntario. Unico forma cu por haya pa convence nan ta, den e caso di e ambtenaarnan, cu si Gobierno por permiti nan, pa bay den veld, manera Corsou tin’e awor aki, por haya un mayor reach cerca e muchanan, Franca a splica.