Pa e parti di legalisa un hende na Aruba of kier haya mas dia pa keda Aruba, no ta cay bou di Directie Wetgeving en Juridische Zaken si no bao di Dimas segun George Croes.
Di September 2014, extension di estadia, ta cay bao di Dimas. Antes eseynan tabata bin DWJZ y tabata yena esaki tambe. Croes ta sigui splica cu esaki ta solamente pa e prome biaha cu un persona ta drenta y ta bay keda na cas di esun cu ta para garante pa su gastonan. E prome biaha ey, esey DWJZ tabata legalisa.
Por yena e formulario y bay imigracion di biaha cune y nan ta haci e controlnan necesario. Croes a agrega un biaha mas cu e proceso di legalisacion ta encera control di firma. DWJZ no ta wak si e persona berdad por cumpli. Ta bisa esaki pasobra ta mira hopi caso di personanan cu ta bin eynan, ta firma bay, nan ta para garantia. Pa cada formulario maximo 3 persona por para garante y ta wak na nan cu nan no tin e capacidad financiero pa para garantia. Si algo a bay malo y e persona cu a invita cu ta trece gasto pa Gobierno, tin cu paga. Ta mescos cu por ehempel cu para garante pa un fiansa di un otro na banco, abo ta e responsabel. Hopi hende no ta realisa esey. Ta mira personanan na nan paña, na nan uniform, nan manera di haci cu nan no tin e capacidad financiero. Croes no por stop esey. E unico cos cu ta haci ta controla e firma. Cu e persona despues ta haya su mes den problema, e tin cu para responsabel. B’a firma, bo tin cu para pa loke bo ta firma. No ta pa DWJZ husga si e persona berdad por para garante. Di loke ta mira casi tur dia, ta hendenan cu nan ta mira como djis como un otro formalidad. Un otro obstaculo, si por yam’e asina, cu Gobierno ta pone den caminda pa por trece un hende aden. Impresion fuerte ta, Croes a splica cu hopi hende cu ta firma e cartanan aki, nan no tin idea kico nan ta firmando, kico nan ta cargando. Un persona cu a invita, el a haya un desgracia y mester bay den hospital y no tin seguro medico, e garante tin cu para responsabel.