Den un entrevista cu director di Directie Wetgeving en Juridische Zaken, George Croes, e ta splica kico ta e cambionan cu ta wordo haci pa loke ta trata e carta di garantia pa personanan procedente di Colombia y/of Venezuela.
Tin e cartanan di garantia, cu ta ser traha door di Dimas y ta wordo uza pa imigracion. E carta di garantia ta wordo uza pa personanan cu ta invita hendenan di afo, cu ta keda cerca nan na nan cas. Ainda ta existi e rekisito cu ora e carta wordo firma, e firma di e persona mester wordo legalisa. DWJZ ta encarga cu legalisacion y apostiya di documentonan. E legalisacion y apostiya ta pa carta of documentonan cu ta bay exterior, pafo di Aruba cu ta wordo uza pa autoridadnan den exterior. No pa Aruba mes. E cartanan di garantia cu ta wordo uza aki pa autoridadnan di Aruba mes, manera imigracion, pa personanan cu ta bin for di paisnan cu no ta cay bao di e obligacion di Visa, nan no mester wordo legalisa. No ta suppose di legalisa documentonan cu ta keda Aruba mes. Manera cu sa, Colombianonan, no ta existi obligacion di Visa mas y pa Venezolanonan nunca tabata existi esey. Pero toch a bin exigencia di esey. Croes a splica cu no ta bay legalisa e cartanan di garantia mas. E cartanan di garantia, mester keda wordo yena y firma, pero e legalisacion no ta necesario pa personanan cu ta di paisnan cu no ta cay bao di e visumplicht, manera Venezuela y Colombia. Pa personanan cu ta bin di e paisnan cu ta cay bao di Visumplicht manera Republica Dominicana y Haiti, nan si mester legalisa na DWJZ e firma, segun George Croes.
