OHIO, Merca- Al menos cinco planta di General Motors na Merca lo cera otro aña, den pleno guera di invoerrechten entre Merca y China.
E empresa automotriz General Motors a anuncia di lo cera varios planta na Merca, como tambe recorte den su personal door di e caida den e demanda di autoann sedan.
E recorte ta inclui un 15% di empleadonan den fabrica, como tambe 25% di su ehecutivonan, cu cual e ta spera di spaar 6 biyon dollar, segun ABC News.
E tres plantanan di ensamblahe cu lo cera ta uno na Lordstown, Ohio, otro na Detroit Hammtramck na Michigan y un di tres na Oshawa, den e provincia di Ontario. Varios otro planta ta coriendo e mesun risico, uno na Detroit, otro na Baltimore y un otro na Maryland.
E modelonan cu General Motors lo stop di produci ta Chevrolet Cruze, Cadillac CT6 y e Buick LaCrosse, entre otro.
MOTIBO
E demanda di e autonan sedan tradicional y e invoerrechten ariba hero cu e gobierno di Trump a impone tabata tin su impacto ariba General Motors cu’n gasto calcula na 1 biyon dollar, segun e agencia Reuters.
“Nos ta ahustando e capacidad di e realidad di mercado”, e presidente ehecutivo di e compania, Mary Barra a bisa.
E medidanan nobo aki, cu lo wordo discuti cu e Sindicato di Trahadonan di Auto (United Autoworkers) otro aña, cual ta suma na e 50 mil retironan negocia na su empleadonan na october ultimo.
CANADA
Prome Minister Canades Justin Trudea a bisa di ta “sumamente desapunta” pa e decision di cera e fabrica na Oshawa, Ontario. “Trahadonan di GM ta forma parti di e alma y curason di Oshawa pa varios generacion y nos lo haci tur lo posibel pa yuda e famianan afecta pa esaki”.
SINDICATO
Sindicatonan no ta nada contento. E sindicato cu ta representa e trahadonan Canades den un comunicado a bisa cu e decision di GM no ta cumpli cu cierto acuerdonan haci cu e miembronan di e sindicato durante negociacionan di contrato colectivo na 2016. Algun trahado na e planta di Oshawa a tene un ‘walk out’ dialuna.
E cuater plantanan na Merca ta emplea un combinacion di 3800 trahado, tanto esunnan a base di hora como esunnan den staff y e planta na Oshawa ta emplea 2900 trahado. E planta na Detroit- Hammstrack ta e ultimo di GM den e ciudad y esun na Lordstown ta esun di mas grandi.
E sindicatonan den e industria automotriz a bisa di lo bringa e decision aki.
“E decision insensible di e GM pa corta of reduci operacionnan den plantanan Mericano, mientras e ta habri of aumenta produccionnan na Mexico y China pa bende cu consumidonan Americano, ta, den su implementacion, haciendo un daño na e forsa laboral Mericano”, Terry Dittes, vicepresidente di e sindicato a bisa.