Dialuna, pa medio di un comunicado, Corte a purba di trece un clarificacion pa loke ta trata e Venezolanonan cu a wordo haya riba rif, y cu a purba drenta Aruba di manera ilegal. Segun corte, e caso aki a trece basta confusion den e comunidad.
Corte ta di opinion cu no por tene e stranheronan (den e caso aki, e ciudadano Venezolano) deteni mas, cu intencion pa deporta nan, si nan (e Venezolanonan) haci un peticion pa asilo politico. Esaki corte a purba na clarifica dialuna, por medio di un comunicado. Ta trata di e caso di e 9 Venezolanonan cu siman pasa a keda deteni ora cu nan a yega riba rif banda di refineria CITGO. Un situacion hopi confuso pa hopi, y cu por facilmente haya un interpretacion robez. Corte kier a splica cu no a djis duna ordo na gobierno pa suspende e detencion di e stranheronan y laga nan bay sin mas, pero cu tabatin un motibo pa esaki. Y ta sigui cu un splicacion tecnico di kico e situacion ta.
Corte ta di opinion, cu den caso cu un stranhero keda deteni, cu e intencion pa wordo deporta, e huez comisario tin e deber legal pa proba si e stranhero a keda deteni legalmente y tambe si por expuls’e. Den e caso aki segun e comunicado, e Venezolanonan durante nan interogacion, a laga sa cu nan kier pidi asilo politico. Esey no por cerca un huez comisario sino na pais Aruba. Basa riba e tratado di refugiado, un stranhero no por wordo deporta si e pais no a dicidi ainda riba su peticion pa asilo. E frasenan aki di e tratado, cu a wordo acepta pa gobierno di Aruba, mester, manera tur otro caso legal, wordo aplica pa e huez cimisario.
Den e caso aki e huez comisario a dicidi cu e detencion cu e intencion pa expulsa e stranheronan, ta legal. Pero basta e stranheronan entrega un peticion oficial ainda cerca gobierno. No tabata conoci e momento ey si esey a sosode. Si esey a sosode, gobierno no tabatin e autoridad mas pa expulsa nan, prome cu a dicidi riba e asilo, y tene nan cera. Esaki di acuerdo cu e tratado.
Por ultimo, e comunicado ta bisa cu e huez comisario no a dicidi cu gobierno di Aruba tabata obliga pa suspende e detencion di e stranheronan y laga nan den libertad. “El a djis dicidi cu e stranheronan no por a keda deteni cu intencion di keda expulse, si nan (e stranheronan) ainda pidi asilo politico”.