PETTEN, Hulanda- E gastonan pa ruim op e residuonan nuclear na Petten (Noord- Holland) ta sigui subi. “Ta papia di un aumento skerpi, pero di otro banda, e gastonan tambe ta insigur di kico nan ta”, segun un vocero pa e compania Nuclear Research & consultancy Group (NRG), cu ta produci medicinanan molecular na Petten.
E programa di television Nieuwsuur diamars a bisa cu basa ariba documentonan confidencial cu tin mester di mas placa pa ruim op e residuonan nuclear na un manera sigur y tin mester di mas cu e 100 miyon Euro cu a wordo presupuesta pa esaki inicialmente. Ainda mester di 71 miyon euro extra. Pero esaki no por a wordo confirma door di e Ministerio di Asuntonan Economico pero tampoco door di e vocero di e compania.
Tur e residuonan nuclear warda na Petten, mester wordo traslada pa un deposito central na Borselle, pa despues sigui cu e desmantelacion di e instalacionnan na Petten.
Legalmente, e residuonan mester ta na Borselle pa mas tarda aña 2022, pero ta duda cu si lo por logra e deadline aki.
Pa NRG e gastonan ta un strobacion. “E ta stroba nos den nos trabaonan comunitario, cual ta di produci medicinanan pa pashentnan di cancer. Door di e gastonan nos por inverti menos den innovacion. Mester busca un solucion pa cu esaki”.
E decision pa deposita tur e residuonan nuclear na un luga central ya caba a wordo tuma den añanan 1980. “Pero na caminda a bin ripara con dificil esaki ta”, segun e vocero di NRG. Segun e compania, no ta mucho cla cual ta e exigencianan cu mester cumpli cun’e pa entrega di e residuonan.
Fuente: De Telegraaf