Madruga di diaranson, varios gang criminal di Haiti, pais cu ta bibando un escalada fuerte di violencia, a lansa atake nobo den e comunidadnan, algun di nan hopi pacifico, di e barionan di e capital, Port-au-Prince.
Entre e comunidadnan ataca cu tiro tin Meyotte, Diegue, Metivieer y un biaha mas Petion-Ville, segun AP, caminda e periodistanan a informa di a mira por lo menos cinco cadaver den e zonanan aki.
Durante e atakenan, e gangnan a blokia e acceso na algun area di e comunidadnan aki. Memey di e tironan, e bisiñanan a yama e stacionnan di radio pidiendo ayudo di polis.
E atakenan aki a tuma luga dos dia despues cu un dozijn di cadaver a wordo descubri den Petion-Ville, den e region metropolitano di Port-au-Prince.
Dialuna, e gangnan criminal a ataca e barionan di Laboule y Thomassin, cu ta forma parti di Petion-Ville. Varios homber arma a lanta contra un banco, un stacion di gasolin y varios negoshi priva. Agregando n’esaki, varios cas a wordo sakia p’e delincuentenan, entre nan e cas di e hues di Corte Superior di Cuenta y di e Contencioso Administrativo, Pierre Volmar Demesyeux, kende a wordo evacua.
Tambe dialuna, varios grupo criminal arma a ataca e Banco di e Republica di Haiti (BRH), ubica na Port-au-Prince, sinembargo, e forsanan di siguridad a logra wanta e accion.
Memey di e intento di asalto, entre tres y cuater asaltante a fayece y un di e agentenan di siguridad di BRH a resulta herida cu bala.
Evacuacion
Di un otro banda, memey di e crisis aki, e Ministerio di Defensa di Republica Dominicana a informa diamars cu a a evacua di Haiti y a hiba n’e teritorio Dominicano na por lo menos 296 persona di varios organismo internacional.
“A traslada p’e teritorio Dominicano e personal cu tabata traha den Union Europeo, Banco Mundial, e embahada di Canada, Fondo Monetario Internacional, Nacionnan Uni y e embahada di Cuba,” e comunicado ta indica.