E aña aki Ministerio di Cultura conhuntamente cu Comision Celebracion Dianan Nacional a organisa varios competencia escolar enconexion cu Celebracion di Dia di Himno y Bandera 2024. Esaki a resulta un exito cu participacion di un cantidad di alumno di varios scol.
Recientemente Comision Celebracion Dianan Nacional a entrega premio na e ganadonan. Den e competencia di fotografia pa muchanan di scol basico, e ganado a resulta e hoben Hayzey Arends di klas 4b di Colegio Conrado Coronel. E potret ganado a wordo describi como lo siguiente:
“Mi Aruba stima, ki orguyoso mi ta di tin bo como mi hogar. Cu orguyo mi ta comparti mi cas cu hopi bishitante, cu kier bin admira bo beyesa sin igual. Nos beachnan precioso y nos hendenan caluroso ta haci cu Aruba ta keda e Isla mas gusta y bishita. Na mi Isla e subida y bahada di solo ta algo fenomenal”.
E ganado den scol preparatorio a resulta e hoben Emmanuel Garcia di Scol Preparatorio Cayena. E potret ganado a wordo describi como lo siguiente:
“Mi ta sintimi orguyoso di e bunitesa di nos lama color blau scur bunita , cu ta rondona nos isla. Danki na e lama bunita aki nos tin hopi turista cu ta bin di afo pa disfruta di nos dushi isla. Mi Aruba stima mi ta orguyoso di bisa Arubiano mi ta”.
Ademas cu e muchanan ganado a ricibi nan premio, nan klas tambe ta ricibi un premio. Minister Xiomara Maduro ta felicita e ganadonan y ta gradici un biaha mas tur scol y muchanan pa a participa den e competencianan. Masha danki na e docente y mayornan pa motiva y brinda ayudo na nos muchanan, pa asina nan balora y aprecia mas Nos Dia Nacional, Dia di Himno y Bandera y asina sigui sinti nan mes orguyoso di ta Arubiano.
