E ekipo completo di Dienst Publieke Scholen (DPS) a keda hopi contento ora cu nan a tende cuanto di nan docentenan a wordo nomina pa un Appel di Oro y mas ainda tabata emociona ora cu durante di e anochi di premiacion, 8 di nan docentenan y actornan di sosten a gana un Appel di Oro. Pa comparti e emocion cu e ganadonan, e orguyo di DPS, e “schoolbestuur” a organisa un atardi ameno pa e ganadonan pa celebra nan premio.
Juffrouw Mimi Lampe, awendia den su funcion nobo di “Staffunctionaris Onderwijs en Leerlingenzaken” na Dienst Publieke Scholen (DPS), a expresa cu ohala tur docente por haya un Appel di Oro, pero como cu esey no ta posibel, DPS ta considera cada ganado, un embahador entre nan coleganan motivando henter e team di docentenan na e scol.
“DPS ta desea cu nan por sigui eherce nan trabao den un ambiente agradabel cu tur e hermentnan cu nan mester y principalmente, e motivacion pa traha cu e muchanan; pa yuda e muchanan y percura cu tur mucha resalta riba nan nivel y segun loke nan por,” asina Juff. Mimi Lampe a expresa.
Pasion ta un factor cu tur e ganadonan di Appel di Oro tin en comun y ta algo hopi importante. Mimi Lampe a comenta cu esaki no ta conta solamente den enseñansa, pero pa tur otro profesion; mester tin pasion, gana, gusto den e trabao y automaticamente e resultadonan di e persona lo ta miho.
Lampe a tuma Juffrouw Mey como ehempel. El a traha cu e docente aki kende ta specialisa pa traha cu muchanan cu necesidadnan special. El a comenta cu e tin hopi admiracion pa e pasion cu e juffrouw ta desplega y tin hopi admiracion pa hendenan cu un pasion asina extra special pa traha cu hobennan special, como cu e ta tuma hopi di e persona cu ta traha cu nan pa yuda nan bay dilanti. E hobennan ta bay dilanti cu pasonan chikito. Ta un hecho cu tur hende ta yega unda cu nan mester yega y ta traha segun nan nivel y e hobennan cu necesidadnan special ta rekeri un poco mas esfuerso.
E luna di enseñansa, esta October, ta un luna basta bisa pa e “veld” pero e parti bon di e celebracion ta cu por mira un “boost” grandisimo den e periodo aki, segun Mimi Lampe. Na tur scol por nota mas movecion, e emocion di nominacionnan, e compañerismo pa organisa lectura y atencion pa programanan special.Naturalmente despues ta agrega na e emocionnan cu e anuncio di nominacionnan y e ganadonan di e Appel di Oro.
“Ohala por duna tur persona cu ta traha den enseñansa un premio, pasobra tur ta traha duro”, asina Juffrouw Mimi Lampe a conclui bisando y esaki ta conta no exclusivamente pa e docentenan, pero sigur tambe pa e actornan di sosten manera assistentnan den klas, guia interno, etc. Tur merece un premio!