Sra. mr. Evelyn Wever- Croes, den su calidad di Formador ta anuncia e gobierno nobo, cual ta gabinete Wever- Croes pa periodo di gobernacion 2017-2021.
Primeramente, el a cuminsa na gradici na cada un pa e pasenshi demostra den e luna di formacion y el a haya espacio pa forma e gobierno. A pensa di bay den direccion unda cu prensa ta un pilar importante pa garantisa nos democracia. Gabinete Wever – Croes, consistiendo di MEP- POR y RED ta un realidad.
Sra. mr. Evelyn Wever- Croes a sigui bisa, cu negociacionnan no a bay facil y mester bisa cu e tres partidonan a bay campaña cu cierto puntonan, cu algun posicion contradictorio na otro y pueblo a papia. Nan no a pidi pa coalicion, pero pueblo a papia y nan a asumi nan responsabilidad pa forma un coalicion. Nan a enfoca ariba loke nan tin en comun y locual nan tin en comun ta den e acuerdo di gobernacion.
Dia 12 di October, el a haya e opdracht di gobernador pa cuminsa e proceso di formacion di un gobierno. Ya dia 17 di October nan a firma e acuerdo di formacion, caminda nan a pone den liñanan grandi kico nan ta para pe. Dia 1 di November nan a firma e acuerdo di gobernacion.
Diabierna ultimo nan a anuncia cu nan a keda cla cu reparticion di cartera y a tuma algun dia pa caba di formalisa tur cos. E procedura a tuma a tuma su tempo. Nan a enfoca ariba nan puntonan en comun, cualnan ta na prome luga, Integridad y Bon Gobernacion. Ora ta pone bon gobernacion y integridad como prioridad, ta pone cu den e proceso di formacion tambe bo tin cu cuenta cu esaki como nr. 1. E di dos punto, ta e parti financiero di pais Aruba. E gastonan di nos pais mester wordo baha, pa sanea e situacion financiero, y e di tres ta pone e ser humano central. E siguridad y trankilidad di e ser humano, e cuido medico, enseñanza, vivienda social pa e ser humano.
Na caminda lo topa cu puntonan cu kisas no a papia ariba dje. Den e caso asina lo tin un comision, cu lo atende cu posibel conflictonan pa evita cu algo asina lo nifica e fin di e coalicion.
E comision lo ta manera un mediador, cu no necesariamente lo ta di minister, pero personanan den diferente posicionnan, pa surpasa cualkier diferencia.
CANTIDAD DI MINISTERNAN
MEP a bay eleccion cu e ponencia, cu lo bay baha gasto y p’esey lo bin cu shete minister. Na caminda pueblo a bisa nan , cu e pueblo tin otro intencion y ta pa forma un coalicion. Pueblo a pidinan pa bay “the extra mile”, pa haci’e mas amplio posibel, cual a pone cu a haci’e 8 minister. Pero tin cierto condicionnan. E punto di 7 minister tabata pa baha gasto, y kisas door di 8, lo haci’e na un manera diferente. E gobierno anterior tabata tin nuebe minister, como 400 coordinador, di cual Minister Presidente so tabata tin 150 coordinador, cu salario di casi 9 mil florin pa luna. Esey no ta bay e caso den e gobierno aki, unda cu lo bay di 15 pa 20 coordinador, depende e cartera. Esey ta e prome punto.
E di dos punto ta reparticion di e carteranan. Siguientemente e lista di e minsiternan pa e Gabinete Wever- Croes.
Gabinete di Gobernador a anuncia e gabinete nobo di Aruba y siguientemente lista di ministernan pa gabinete Wever- Croes pa periodo di gobernacion 2017- 2021:
Ministerio di Asuntonan General, Integridad, Energia y Innovacion, Sra. mr. Evelyn Wever -Croes (MEP)
Ministerio di Finanza, Asuntonan Economico y Cultura, Sra. drs. Xiomara Maduro (MEP)
Ministerio di Asuntonan Social y Labor, Sr. Glenbert Croes (MEP)
Ministerio di Turismo, Salubridad y Deporte, Sr. Danguillame Oduber (MEP)
Ministerio di Transporte y Comunicacion, y Sector Primario, Sr. Chris Romero (MEP)
Ministerio di Infrastructura y Medio Ambiente/Vice- Presidente, Sr. Otmar Oduber (POR)
Ministerio di Husticia y Inmigracion, Sr. mr.Andin Bikker (POR)
Ministerio di Enseñanza, Ciencia y Desaroyo Sostenibel, Sr. drs. Armando Lampe (RED)
Minister Plenipotenciario, Sr. Guilfred F. Besaril (MEP)
Presidente di Parlamento, Sr. mr. Juan “Ady” Thijzen (MEP)
Na final, Sra. Wever- Croes a gradici e cooperacion di Sr. Jossy Figaroa, director di APA, pa a permitinan haci uzo di e conference room di APA. Un trabao grandi ta tras di lomba, pero un otro trabao grandi ta nan dilanti. Huramentacion di e ministernan lo tuma luga diabierna, 17 di November, den un ceremonia cu ta wordo regla door di Gabinete di Gobernador. Pa celebra toch cu e pueblo, lo tin un ceremonia pa celebra hunto cu e pueblo, diabierna anochi di 7 or pa 9 or riba Plasa Betico Croes.