Nos ta desea di manda un mensahe di conseho y alerta pa tur e NVnan di Gobierno pero principalmente: WEB N.V., ELMAR N.V., AAA N.V., SETAR, APA N.V., y RDA N.V. pa no coopera cu Gabinete Mike Eman su intento pa saca mas placa di dividendo pero alabes poniendo tur e companianan aki di Pueblo endeuda nan mes mas ainda pa duna Gobierno mas placa cu sin duda lo wordo malgasta den e campaña proximo, esaki ta segun parlamentario Glenbert Croes.
E parlamentario ta sigui splica: “Nos kier alerta principalmente e gerencianan, hunta directiva y principalmente nan sindicatonan pasobra si Gabinete Mike Eman logra saca e placa aki di e NVnan di Gobierno esaki lo wordo derocha mientras cu e unico proposito di Gabinete Mike Eman ta pa sigura cu e Gobierno nobo di MEP no haya niun placa den caha di Gobierno ora cu e Gobierno nobo wordo eligi 22 di September proximo cual lo haci e problemanan pa resolve aun mas grandi.
Nos a compronde cu for di WEB so nan kier saca alrededor di 50 miyon florin, cual lo ta devastador pa WEB, pasobra e lo afecta e solides financiero di WEB, e capacidad di WEB pa cumpli debidamente cu e CAO vigente cu tin cu tur e trahadonan di WEB, y cu como consecuencia esaki lo pone cu WEB lo mester bolbe hisa prijs di awa y coriente matando nos Pueblo djis pa cumpli cu antoho di malgasto y mas endeudamento di parti di Gabinete Mike Eman.
Esaki ta inaceptabel, iresponabel y inhusto pa cu nos Pueblo, y Partido MEP ta urgi Gerencia, Sindicato y Hunta Directiva di WEB, ELMAR, AAA, APA, SETAR y RDA pa NO COOPERA cu e asunto aki. Nos ta urgi tambe pa tuma tur paso cu por wordo tuma cu forsa contundente pa no permiti mas crimen wordo cometi.
AVP a endeuda Aruba y nos Pueblo. AVP a zink Aruba y nos Pueblo. AVP ta matando futuro di tur e yiunan di nos Pueblo. Awor nan kier caba kibra tur e NVnan di Gobierno y Pueblo tambe? INACEPTABEL.”