For di aña 2001 a bira un tradicion caba cu Radio Galactica 99.9 FM, awendia conoci como G-FM 99.9, ta presenta un marathon di Oldies den e ultimo siman di October.
E aña aki Oldies ta celebrando su di 25 aniversario y pa cu esaki lo tin un programacion special.
Joe Hernandez y Tico Bee ta presenta un aña mas, pa di 15 aña consecutivo, Marathon di Oldies y e biaha aki conmemorando 25 aña di existencia di e programa exitoso aki. Algo particular y cu mester resalta ta cu Joe mes a cuminsa na radio riba un 25 di October na aña 1982, na Radio Carina e tempo ey.
Tico Bee mes tin 25 aña tambe den e mundo di radio difusion na Aruba, di cual semper el a labora na Radio Galactica sin bay ningun otro radio.
Casualmente Joe Hernandez y Tico Bee a cuminsa presenta e Marathon di Oldies riba un 25 di October, pero di aña 1991 na Radio Galactica.
Manera ta custumber caba e gran famia di G-FM 99.9 lo bini hunto pa presenta e Marathon di Oldies hunto cu Joe Hernandez y Tico Bee. A ahusta e programacion di G-FM den e siman di 23 pa 30 di October, pa asina duna espacio na e marathon aki cu lo presenta musica di añanan ‘50 te cu ‘90.
E marathon lo cuminsa diadomingo awor, 23 di October, pa 5 pm y ta caba diadomingo dia 30 di October pa 8’or di anochi. Den e siman aki lo tin programacion continuo den formato “live” presenta pa e diferente locutornan di G-FM 99.9.
Bo ta cordialmente invita pa join Joe Hernandez, Tico Bee y e gran famia di G-FM 99.9 cu e Marathon di Oldies cu lo hibabo den un biahe bek den tempo.