BRASILIA, Brazil- E curpa sin bida di Daniel Corrêa Freitas a wordo haya na São José dos Pinhais, Curitiba. Polis a confirma cu e defunto a fayece door di un atake cu arma blanco y cu nan a corta su penis afo.
Diasabra den oranan di atardi, a bin haya e curpa sin bida di e futbolista Daniel Corrêa Freitas tira banda di caminda na São José dos Pinhais, area metropolitano di Curitiba. Según e Instituto Medico Legal di Curitiba, cita pa O Globo, e causa di morto ta lesion door di arma blanco.
Polis ta descarta un posibel robo y a confirma cu e victima a wordo tortura. E tabata tin dos hinca profundo na su garganta y incluso su organo genital a wordo corta afo.
Corrêa Freitas tabata tin 24 aña y a cumisna su carrera cu Cruzeiro. Ademas, el a actua den Botafogo, Ponte Preta, Curitiba y São Paulo, ekipo na cual e tabata pertenece actualmente, aunke el a wordo transferi pa São Bento.
E ultimo aki a difundi un comunicado den cual el a señala cu e club ta lamenta e hechonan y ta solidarisa cu e famia y amigonan di e hungado na e momentonan aki ta di profundo tristesa.
Tambe Botafogo a expresa nan sentimentonan, unda cu el a recorda cu e ekipo aki a disputa “29 partido y a anota 5 gol”. Nan tambe a extende nan solidaridad di e demas clubnan cu cual el a hunga.
Na e momento aki no ta conoci ken a asesina e futbolista aki y cual tabata nan motibo. Lo ultimo cu sa di dje ta cu diabierna anochi Corrêa Freitas a bay un fiesta y despues di esey no a tende mas di dje, te cu nan a hay’e morto.