Recientemente Cuerpo Policial Aruba hunto cu Ministerio Publico a anuncia “Fusion Center Aruba”. Fusion kiermen literalmente smelt hunto. Un fusion di estilo, na Hulandes “een fusie”. Den e caso aki ta referi na e organisacionnan di informacion di Cuerpo di Polis Aruba, Kustwacht, Koninklijke Marechaussee y RST. Siman pasa nan a firma un acuerdo di colaboracion.
Den Fusion Center Aruba e partidonan participante ta colabora cu otro riba tereno di informacion pa yega na un bon posicion di informacion y maneho di informacion. Un colaboracion cu ta forma e fundeshi pa intervencionnan pa cu maneho di informacion (hunto) cu ta na beneficio di siguridad na Aruba.
E meta comun di Fusion Center Aruba ta pa haci e suministro di conocemento y di informacion optimal riba tereno di prioridadnan defini pa e partidonan, sea esaki ta solicita of no, den e cuadronan legal, pa medio di colecta, agrupa, refina y analisa informacion relevante di e partnernan, pa sostene e practica di derecho publico di e partidonan.
Fusion Center Aruba tin como tarea pa, por medio di intercambio di informacion, yega na producto y servicionan cu ta na beneficio di e fortalecemento di e posicion di informacion di tur partido pa mehora siguridad na Aruba.
E “Gedetineerde Recherche Informatie Punt” (GRIP), esta ‘Centro di Informacion di Recherche’ pa cu detenidonan ta organisa den Fusion Center Aruba. E partidonan di Fusion Center Aruba y Korrektie Instituut Aruba (KIA) ta traha hunto y ta intercambia di informacion den cuadro di risico pa scapa, orden publico y siguridad den e institucion y pa prevencion y deteccion di hecho nan castigabel.
Sea solicita of no solicita, nan ta duna otro conseho tocante detenidonan, bishitantenan y permiso pa sali (verlof) di detenidonan. Den futuro cercano GRIP lo suministra Aruba cu analisisnan di menasa pa cu detenidonan.