FUNDECO – Fundacionan den Cooperacion – ta representa un cantidad di 20 fundacion (NGO) riba tereno social, cuido, educacion y otro tereno. FUNDECO cu asistencia financiero di CEDE a organisa un siman di tayer pa su fundacionan miembro y pa funcionarionan gubermental riba tereno di maneho den sector social, cuido y educacion. E siman di tayer ta bou encargo di sr. Frits van Vugt, un experto riba e topico di ‘resultaatgerichte verantwoording’ y ‘outputsubsidie’. E tayernan a wordo duna na Universidad di Aruba, henter e siman di 5-9 di Juni.
E tayernan aki a trata e sistema nobo di subsidio – ‘outputsubsidie’ – pa e fundacionan den cual no ta enfoca mas riba e costo di e operacion di e fundacionan pero riba e resultado, e ‘output’ cu e fundacion a realisa cu su costonan manera su personal y otro gastonan operacional. E resultado di e actividadnan di e fundacionan ta esun cu ta wordo evalua pa bin na remarca pa subsidio, pues e resultado ta esun cu ta conta. E calidad di e resultado (‘output’) tambe tabata un topico importante den e tayernan.
E tayernan aki ta unico pasobra directiva y colaborador di e fundacionan y funcionarionan di diferente Ministerionan cu ta encarga cu maneho lo participa conhuntamente. Un meta di e tayernan tambe ta pa stimula y promove e entendimiento entre fundacionan y e Ministerio concerni pa cu e retonan cu e sistema nobo ta trece cun’e. Su consecuencianan ta grandi pa tur fundacion cu ta ricibi subsidio di Gobierno.
Pa mas informacion riba e contenido di e comunicado di prensa aki por tuma contacto cu Ru Croes, Presidente di FUNDECO ([email protected])