Dia 24 di September HIAS, UNHCR, Cedehm y FCVR a uni forza pa brinda e profesionalnan cu ta traha riba e tereno y den veld un workshop tocante di e topico GBV “Gender Based Violence”, violencia di genero. Temanan manera consecuencia riba salud, salud mental di tanto e victima como su eventual yiunan a keda trata ademas di e aspectonan huridico. Sra Anouk Balentien a duna un bon splicacion di e leynan cu nos tin na Aruba. Na final di e workshop por a delinea e camindanan cu por cana pa yuda e victima. Loke cu a resalta tabata e vacuum cu tin
den nos Sociedad pa cu refugio pa e hende homber, y tambe pa menornan di 16-17 aña cu kier huy for di famia violento.
Oradornan e mainta a inclui: Sra. Cinthia Quant, kende ta un Psychologo hoben specialisa den e materia cu despues di a traha un tempo pa cu FCVR, ta trahando awendia na HIAS na unda e por duna mas atencion na e grupo di LGBTQ+. Yaxzuly Toyo, psychologo infantil di FCVR a elabora riba e tema di famia y e consecuencianan cu e tin pa cada miembro di famia ya cu tur
persona den famia ta “intertwined” cu otro.
Sra. pediatra Louise Rafael Croes, un persona no desconoci den nos comunidad a papia di e prome auxilio pa cu e casonan aki. A hiba palabra tambe Sra. Maria Carasquilla, trahado social di FCVR, cu a elabora tocante nos casnan di refugio, nan importancia y e programa cu fundacion ta implementa pa cu cliente. Sra Magaly Maduro kende ta coordinado na FCVR a expresa e mainta ey cu e ta sumamente contento di mira un sala yen cu alrededor di 90 persona interesa den e topico. Tambe ela subraya cu e ta anhela cu banda di adkeri conocemento, e lo kier mira bon cooperacion entre tanto e instancianan di Gobierno como NGO’s. Di parti di Cedehm su directora sra Miangela Ras a yama tur presente bon bini y a para keto na e consecuencia di e pandamia riba e violencia entre genero.
Por bisa cu tur participante a keda satisfecho cu e actividad. Minister Presidente di Aruba, a manda su mensahe virtual, ya cu e ta den exterior, y a reitera su boluntad pa sigi atende cu e causa aki. Minister Rocco Tjon tabata presente y di parti di parlamento Sra. Shailini Lee tabata presente cu semper a mustra interes pa cu violencia domestico y con nos ta maneh’e na Aruba.