Fundacion Telefon pa Hubentud Aruba exportando conocemento

Ariba 14 di juni ultimo a tuma luga un reunion entre Fundacion Telefon pa Hubentud Aruba y Staatssecretaris di Volksgezondheid, Welzijn en Sport di Hulanda. E peticion pa un reunion a bin di e Staatssecretaris di Volksgezondheid, Welzijn en Sport di Hulanda, señor drs. Paul Blokdijk. E reunion aki a bay den cuadro di un peticion pa ayudo for di e islanan BES na Fundacion Telefon pa Hubentud Aruba.

Fundacion Telefon pa Hubentud Aruba ta existi for di 1999. For di 1999 Fundacion Telefon pa Hubentud Aruba ta duna informacion, conseho y sosten emocional na e muchanan y hobennan di Aruba via internet, telefon y outreachend. Pa medio di e mentornan cu tur aña ta ricibi un minimo di 3 training grandi, e trabao boluntario aki ta ser haci pa nos muchanan y hobennan.

Banda di e ayudo na nos muchanan y hobennan di Aruba, Fundacion Telefon pa Hubentud Aruba pa añas caba ta yudando otro islanan den Caribe y paisnan den Latino America. Asina aki ya na 2007 a yuda St. Eustatius y Bonaire. E liña di ayudo pa mucha na Curacao pa un tempo a stop di funciona. Na momento cu esaki a cuminsa opera atrobe den un structura nobo, tambe Fundacion Telefon pa Hubentud Aruba a sostene cu conseho. E proximo den liña cu a ser yuda cu conseho y training tawata St. Maarten. No solamente e liñanan di ayudo a ricibi conseho y training, pero hopi biaha Fundacion Telefon pa Hubentud Aruba a hiba combersacionnan cu ministernan y stakeholdernan na e islanan pa crea sosten.

Otro isla den Caribe cu a ser sosteni, conseha of getrain door di Fundacion Telefon pa Hubentud Aruba ta St. Lucia, Anquilla, Dominica, St. Kitts & Nevis, Antiqua & Barbuda y Jamaica.

Den Sur America tambe Fundacion Telefon pa Hubentud Aruba a yuda e liña di ayudo di Suriname cu training y conseho, Peru cu training con nan por funciona outreachend y Colombia cu training tocante uzo di app.

Ya caba den pasado Fundacion Telefon pa Hubentud Aruba tawata representante di America Norte, Centro y Sur y Caribe den e directiva di Child Helpline International pa medio di sra. Altagracia Chapman MBA. Desde 2019 Fundacion Telefon pa Hubentud Aruba atrobe ta representante di  America Norte, Centro y Sur y Caribe pa medio di sr. Errol Zebeda Lic.. Y na januari 2021 e representacion di Fundacion Telefon pa Hubentud Aruba a ser extendi pa tres aña mas.

Basa ariba tur e experiencia, habilidad y conocemento crea den e ultimo 22 aña, Fundacion Telefon pa Hubentud Aruba ta ser reconoci como un ‘Kenniscentrum’ ariba e tereno di ‘jeugdzorg’, duna informacion, conseho, sosten y guia na mucha y hoben, outreached na mucha y hoben, conocimento di efecto cultural y etnico ariba comportacion di mucha y hoben, y envolvimento di mucha y hoben den nan desaroyo. Un ‘Kenniscentrum’ ta un instancia cu no solamente ta comparti conocemento, pero tambe ta crea conocemento.

Basa riba e ariba menciona, e  Staatssecretaris di Volksgezondheid, Welzijn en Sport di Hulanda a reuni cu Fundacion Telefon pa Hubentud Aruba pa mira na ki manera Fundacion Telefon pa Hubentud Aruba por yuda, guia y sostene e islanan BES den e proceso pa yega na nan liña di yuda pa mucha y hoben. Durante e reunion cu a tuma luga digital, cofundador y miembro honorario di e directiva di Fundacion Telefon pa Hubentud Aruba Altagracia Chapman MBA y e director James Sneek LLB, MSc. a duna un presentacion di e manera di opera y e trabaonan di Fundacion Telefon pa Hubentud Aruba. E delegacion den representacion di islanan BES a consisti di Staatssecretaris di Volksgezondheid, Welzijn en Sport di Hulanda drs. Paul Blokhuis y Beleidsmedewerker Huiselijk geweld en Kindermishandeling Ministerie van Volksgezondheid, Welzijn en Sport sra. Carmen Grefte.

Despues di e reunion e Staatssecretaris di Volksgezondheid, Welzijn en Sport di Hulanda a keda mas entusiasma ainda cu e experiencia, habilidad y conocemento cu Fundacion Telefon pa Hubentud Aruba tin ariba e tereno di ‘jeugdzorg, duna informacion, conseho, sosten y guia na mucha y hoben, outreached na mucha y hoben, conocemento di efecto cultural y etnico ariba comportacion di mucha y hoben y envolvimento di mucha y hoben den nan desaroyo.

Despues di 22 aña di existencia Fundacion Telefon pa Hubentud Aruba como un ‘Kenniscentrum’ ta exportando conocemento na organisacionnan gubernamental y no-gubernamental den region. Banda di crea conocemento, comparti conocemento, awor Fundacion Telefon pa Hubentud Aruba como un ‘Kenniscentrum’ ta bay sigui exporta conocemento.

 

 

 

Comments

comments