Fundacion Stripan presidi pa mr. dr. Rene Rosalia ta participa na pueblo di Aruba en general y amantenan di cultura popular en particular cu e fundacion un biaha mas ta organisa e biahe turistico cultural educativo pa Santiago de Cuba pa participa na Festival del Caribe 2017. E biahe aki ta di dia 2 pa dia 10 di Juli 2017.
Festival del Caribe ta un evento internacional di cultura popular, caminda gruponan cultural popular di paisnan di Caribe ta presenta nan obranan den teater, club, galeria, riba caya, den instituto y museonan di e ciudad Santiago de Cuba. Fuera di e presentacionnan cultural artistico e programa di Festival del Caribe ta ofrece tambe charla, tayer y dianan di conferencia. Festival del Caribe ta e festival cultural di mas grandi den Caribe. Na 2017 e grandioso festival aki ta dedica na nos isla ruman Boneiro.
Tur persona, artista, gruponan cultural cu ta interesa pa participa na Festival del Caribe 2017 ta keda cordialmente invita pa tuma contacto cu representantenan di Fundacion Stripan sra. Maureen Rosalia-Lourens na telefon 696-3204 of sra. Reyeanne Goilo na telefon 520-4681. Por tuma contacto tambe mediante e-mail: [email protected].
Esaki ta un oportunidas unico pa cera conoci cu historia y cultura di e isla cultural di Caribe y tambe pa compaña nos rumannan di Boneiro den nan celebracion na Santiago de Cuba.
Fundacion Stripan ta invita bo.