Fundacion RHD Community Aruba a tuma nota di declaracionnan haci recientemente pa Minister Bermudez. For di Fundacion nos ta lamenta di wak un Vakminister di e caliber cu Sr. Bermudez tin, trece argumentonan dilanti sin haci ningun tipo di investigacion. Minister Bermudez ta bira e di 3 Minister di Gobierno di AVP cu na un manera fini ta trata na proteha sponsornan di e partido na mando.
POLUCION
Un di e argumentonan cu Minister Bermudez ta trece dilanti ta cu autonan RHD cu ta ser importa ta trece polucion pa Aruba y/of ta wordo saca for di circulacion pa tal motibo. Pais Hapon ta e pais cu standard mas halto existente pa loke ta regarda polucion na mundo. En general vehiculonan diesel no ta ni permisibel riba caminda y esnan cu si ta, mester di un sistema di emision pa limpia e gas cu ta sali for di e auto. Mas leu ainda, contrario na e handje vol di inspeccion haci pa DTI aki na Aruba, e sistema bon structura di controlnan di inspeccion di vehiculo na Hapon ta consisti di un total di 60 diferente punto. Hunto cu e sistema aki tin por lo menos 3 tipo di belasting extra mara na dje. E ta hopi ironico cu Minister Bermudez ta papia di polucion, mientras cu no tin ni un mashin pa test e scala grandi di entre otro auto, autobus, trucknan etc cu ta huma nos diariamente, sin papia di Parkietenbos cu ta otro tema riba su mes.
Contrario na e declaracionnan haci pa Minister Bermudez, e motibo real pakico un auto Hapones ta wordo saca for di circulacion, tin di haber cu e gastonan mara na tin un auto na e Pais aki. Tanto belasting como seguro ta aumenta segun cuanto aña e auto tin. Tambe tin entre otro gastonan manera di parkeo y reciclahe cu ta hunga un rol. Hapon tin e di 3 economia mas grandi di mundo y ta lider den e industria di auto na mundo. Dado momento, ta sali mas economico pa cumpra un auto nobo cu paga gastonan halto. Un auto cu wordo declara nulo, ta wordo automatica saca for di circulacion y ta wordo recicla manera scrap metal.
FINANCIERO
Otro tema cu Minister Bermudez a trece dilanti ta cu e autonan RHD ta trece casi nada di entrada pa caha di gobierno. E ironia di esaki ta cu tur luna tin 2 of mas barco ta drenta cu cada un minimo di 20 auto y tur ta paga un averahe di 3 mil florin na invoerrechten. E autonan aki ta paga belasting per direct y no manera esnan di agencia cu ta bay den bond belastingvrij y ta paga te despues cu e auto a wordo bendi. Tambe ta remarcabel cu ta purbando di forsa e pueblo pa bay horca nan curpa den debe, mientras cu tin otro solucionnan practico. Esaki ta hopi contraditorio si wak e maneho di gobierno unda ta papia di mehora poder di compra.
LEY
Fundacion RHD Community Aruba por a scucha Minister Dowers un biaha mas papiando tocante di cambio den ley den un tono arogante. Den pasado Fundacion RHD Community Aruba a sinta cu Minister Dowers pero pa motibonan di manipulacion haci door di su persona den prensa, a termina e combersacionnan. Ta keda sorprendende e postura aki mientras cu Minister Dowers ta na altura di Tratadonan cu Aruba tambe ta mara na dje; tanto e parti cu ta permiti autonan RHD wordo maneha riba caretera como tambe e vrij verkeer den tweedehandse goederen aki na Aruba.
CONCLUSION
Manera e titulo ya ta menciona, Fundacion RHD Community Aruba NO lo participa na e weganan infantil di Gobierno. Manera a bisa Minister President den pasado, nos ta papiando aki di mas cu 8 mil famia cu a sinti un alivio den nan cartera y conforme e Statutonan di Fundacion RHD Community Aruba, lo sali defende e interesnan di manehadornan actual y esnan cu den futuro ta desea di busca un auto RHD. Cu esaki Fundacion RHD Community Aruba ta pone bon cla cu no lo duda di bay per direct den un caso contra gobierno.