Sr. Clifford Rosa di Fundacion Rancho a splica mas di su logronan durante di nan biahe pa La Guajira, Colombia.
Sr. Rosa y Sr. Ryan Oduber a haci un biahe pa La Guajira, Colombia y tur esaki den contexto di e trabao cu ta bin ta haciendo pa un intercambio cultural y comercial. For di 2016, Fundacion Rancho a haya un documento for di Departamento di Cultura, pa asina como Fundacion, nan por sigui traha pa ehecuta e parti di intercambio cultural y comercial entre Aruba y La Guajira.
Durante e biahe aki, hopi cos a sosode, y esun di mas importante pa Fundacion Rancho tabata pa yega na un entendimento cu Gobernador di La Guajira di cual cu algun testigo, p.e. e Presidente di e Camara di Comercio di La Guajira, pa asina haya e oportunidad pa firma un entendimento cu ta duna oportunidad den diferente area di cultura, areanan di educacion y turismo, y ariba diferente tereno. Fundacion ta trahando pa su ehecucion y trece na un contexto mas amplio.
Danki na Sr. Ryan Oduber, den representacion tambe di Biblioteca Nacional,cu tin documentacion y cu e Fundacion Rancho por sigui traha y asina concretisa e parti di intercambio.
En principio, Aruba y Colombia tin un historia di hermandad y den ultimo tempo por bisa cu tin cosnan poco negativo ta sosode. Pero aworaki ta papiando di un globalisacion enorme caminda cu ya caba e movecionnan di barco y di carga, ta registra. Productonan cu ora wordo produci mester tin su certificacion pa e wordo exporta. Segun Sr. Roza, Fundacion Rancho hunto cu La Guajira ta produci producto y e productonan aki ta apto pa exporta. Y si Aruba ta na tempo, nos por bira e prome pais cu ta importa productonan cu ta wordo cosecha y desaroya na La Guajira. Ta papia aki di fruta y berdura. Y kisas den un futuro, manera antes e carni tambe lo por wordo exporta. Esakinan tabata existi caba, y door di cierto regulacionnan, esakinan a para. Pero esaki sigur ta intencion pa trece esaki, den e contexto maritimo, caminda pa generacionnan como Aruba, ta depende di esun cu ta trece e producto, pero den e contexto aki ta traha tambe como Fundacion pa tin e propio transportacion pa bay busca e producto y trece Aruba.
Sr. Roza a sigui splica cu Fundacion Rancho tabata trahando pa eleva e agricultornan di Aruba. Fundacion ta para tras di Santa Rosa. Pero hopi biaha ta wak cu pa falta di experticio, hopi di e agricultornan ta keda toch un tiki pega. Pero esaki ta trece tambe e oportunidad caminda cu tin conocemento cu ta sali for di un instancia cu ta yama SENA na Rio Huacha, La Guajira, cu ta prepara hopi ingenieronan specialisa den e parti di Agricultura, Cria Y Pesca. Y esaki lo por bira un win- win situacion. Y si mester di back up, La Guajira lo por ta e back up pa Aruba por sigui desaroya tambe.
Fundacion Rancho, lo ta celebrando 7 aña y Sr. Roza su deseo ta trece un prome lote di si por bisa un lote di fruta y berdura, caminda cu por tin un mini mercado den e luna di April of despues. Pero otro siman ya caba tin un delegacion chikito cu ta biniendo Aruba, lidera door di e Gobernador y otro instancianan.
Mirando cu locual cu Fundacion Rancho a haci, no ta pa mara esaki na niun diplomacia, ni ningun Gobierno. E ta mas bien un hermandad. Dus dos pueblo cu ta cera hunto pa asina logra ehecuta algo comercial y tambe cultural y asina ey estrecha e lasonan entre e dos pueblonan aki, Sr.Roza a finalisa bisando.