Fundacion Rancho presidi pa Clifford Rosa a informa cu nan a caba di drenta nan sede nobo den Visstraat y ta preparando un exposicion di Alidia Wever compaña pa Ryan Oduber. E lo habri da 31 di juli awo pa 6’or di atardi riba Plaza Rancho.
“Mi no tin palabra” ta titulo di e exposicion di obranan di Alidia Wever.
Rosa a splica cu e fundacionnan, manera Fundacion Rancho, a pasa den momentonan duro durante e pandemia. Nan ta gradicido na Aruba Doet cu a yuda nan den e temporada pa por drenta nan sede nobo den Visstraat.
Awo nan a cuminsa traha riba Hof’I Bario, creando e parti di agricultura urbano na nan sede mes. Un bon ehempel ta e produccion di honing cu nan tabatin recientemente. Banda di esaki ta bay crea un area multidisciplinario di arte, cultura y comercio turistico. Esaki ta algo hopi atractivo, pasobra nan ta situa banda di Museo Arkeologico cu ta atrae bishitantenan caba pa e punto ey.
A haya peticion di scolnan pa e walking tour, cu ta un proyecto cu nan lo hacie pa e bishitantenan. E fundacion tin su number estableci caba, si mira cu nan a haya cliente for di Boneiro cu a bin cumpra tela pa e botonan miniatura cu ta participa den un regatta proximamente na e isla ey.
Pa loke ta e evento di dia 31 di juli, ta bay tin presentacion di Sodo y Cuero, cu ta parti di Aruba su herencia musical.
Tur esaki ta forma parti di celebracion di 200 aña di existencia di Oranjestad. Y tin hopi mas proyecto cu ta den planeamento.