Baha e volumen, respeta mi trankilidad
Nos ta biba den un mundo cu hopi zonido y na Aruba tambe durante di añanan nos a experiencia desaroyonan manera cualkier otro pais na mundo cu ta genera exceso di zonido y cu ta bira boroto. Exceso di zonido tin caracteristicanan specific y por altera e trankilidad y salud di e ciudadano pesey ta importante pa nos cuida nos convivencia pa nos por biba den un ambiente di trankilidad.
Luna di oktober ta e luna cu “Fundacion pa Combati Molester di Zonido” esta “Stichting ter Bestrijding van Geluidsoverlast –SBG” ta conmemora 10 aña di existencia y pa tal motibo ta sigui conscientisa ciudadanonan riba e importancia pa respeta otro su trankilidad.
Asina cu un zonido bira un molester pa otro mester pone atencion riba esaki, por referi na machinenan cu ta genera zonidonan hopi halto 24 ora pa dia. Tambe ciudanonan cu ta organisa eventonan cu zonido y of musica hopi halto pa oranan largo sin tene cuenta cu e habitantenan di e bario. Estudionan na diferente país a demostra cu exceso di zonido ta causa perdida di oido, por contribui na presion halto, problema di respiracion, aumento di tension muscular, y hasta algun medico ta di opinion cu exceso di zonido por ta un factor di riesgo mas halto cu colesterol. Mester tene cuenta si cu pa un zonido produci perdida di oido e zonido mester ta pa 8 ora largo na 85 decibel.
SBG como fundacion ta conciente di tur esaki y awo ta hiba e mensahe aki na scolnan tambe. Recientemente a haci entrega na Directora di SKOA Sra Anuesca Baly un cantidad di poster cu e mensahe “Respeta mi Trankilidad” cu lo keda entrega na tur e skolnan di SKOA. E posternan aki ta hiba mensahe importante pa maestro y alumnonan cu un bida trankil sin molester di boroto continuo of abuso di zonido ta contribui positivamente na nos salud y cu e conscientisacion di esaki ta un prioridad. Ta importante pa nos cuida nos oído evita sonido y musica continuo na volumen hopi halto na cualkier ora di dia. Miembronan di directiva di SBG Sr Evan Giel (presidente) y Sra Cherryldine Buckley a bishita oficina di SKOA pa haci entrega di e posternan Sra. Baly y yama directora di SKOA danki pa nan colaboracion.