Fundacion Museo Arubano e organisacion mama di museonan na Aruba ta sumamente contento cu e acohida di e museonan bou di comunidad local.
Pa e museonan ta sumamente importante pa no solamente ricibi turistanan pero mas importante aun ta pa e comunidad local bishita y conoce mas di nos herencia,
Riba dianan nacional manera Dia di Betico ta fechanan cu e museonan ta wordo masha hopi bishita. E aña aki sigur a haci un gran diferencia mirando cu tin 3 museo cu hopi informacion pa bishita, ta trata aki di Museo Historico na playa y Museum of Industry y Museo Comunitario na San Nicolas. Esaki a sa di trece un trend nobo cune y hopi mas trafico pa pariba di brug.
Fundacion Museo Arubano hunto cu su museonan a organisa un Selfie Scavenger Hunt pa pusha e publico pa conoce e museonan den un forma diferente, caminda tur cu a participa a saca hopi selfie cu e diferente artefactonan na cada un museo.
E museonan ta hopi satisfecho di por a mira asina hopi hoben participante cu a bishita pa absorbe nan historia.
Manera por a compronde di e directora di Fundacion Museo Aruba Anky vrolijk, a conta cu mas di 900 bishitante total cu a yega e museonan. Esaki sigur a kibra tur record di e ultimo añanan.
Loke sigur a haci un efecto positivo ta e museo nobo den Water Toren na San Nicolas cu desde su apertura a sa di crea un atraccion cu ta hiba hende di playa pa San Nicolas. Pa hopi tempo San Nicolas no a sa di tin actividadnan cultural pero cu e museonan lo pecura pa semper crea un actividad pa publico local bishita pariba unda un gran parti di nos historia industrial ta biba.
Awor aki tur 3 museo ta ya caba den full preparacion pa 18 di Maart y ta priminti publico di crea e celebracion mas grandi na Aruba.
Fundacion Museo Arubano y su museonan kier gradici tambe tur su sponsornan cu a aporta cu e premionan di e scavenger hunt, ta trata aki di Renaissance Hotel, Giannis Group, Palm Tours, Antesala Café y Rafa’s Beauty salon.
Aruba completo ta keda cordialmente invita pa bishita e museonan y conoce mas di nos historia.