Manera ta conoci Fundacion Museo Arubano tin varios museo cu e ta maneha: Museo Historico, Community Museum, Museum of Industry y e exhibicion Carnival Euphoria. Aruba ta celebra dialuna awo 18 di maart nos dia nacional y tur 4 localidad ta bay ta habri di 10or di mainta te cu te cu 6or di atardi pa ful Aruba por pasa bishita e museonan pa conoce un tiki mas di nos historia y cultura .
Lo pidi un contribucion chikito di Awg. 2,50 pa persona y esaki ta pa por sigui mantene nos museonan. Tur e museonan ta den un monumento y ta hopi importante pa sigui mantenenan, mirando cu ta material special mester usa pa ora haci reparacion y tambe otro banda e colaboracion ta bay gran parti na e parti educativo di e museonan mirando cu tin diferente actividadnan planea pa haci durante 2019.
Fort Zoutman lo tin un bar y cushina cu lo ta hopi bon surti cu cuminda crioyo. Tambe ta bay tin mesa nan di bolo, cosnan dushi, ta bay tin sopi oester, sopi carni. E programacion na Fort Zoutman tambe ta bay ta hopi varia cu diferente grupo di baile, participantenan di Poeta di Patria, ta bay tin caha di orgel, ta bay tin e cantantenan di e Festival di Un Canto na Aruba su Himno y Bandera y e actividad aki ta bay caba cu ‘Nfuzion na Fort Zoutman di 4:00 pa 6:00pm.
Na San Nicolas tin dos museo cu ta Community Museum y Museum of Industry. Akinan tambe tin un progama elabora di loke ta bailenan folklorico, diferente gruponan di baile cu ta bay ta presente durante ful e dia y lo finalisa e dia cu Rincon Boys di 4:00 pa 6:00 di atardi. Lo inicia e dia cu cantamento di himno na ambos museo. Riba e dia aki ta sumamente importante pa orguyosamente hisa e bandera y e himno lo wordo canta pa Edjean Semeler y Veloushka Krozendijk. Sin lubida e recien inaugura Carnival Euphoria Exhibition cu ta den e bunita edificio di ex Green Hill Supermarket cu tambe lo forma parti di e celebracion di 18 di maart. Fundacion Museo Arubano ta consisti di un team chikito y riba e dia aki ta conta cu e sosten di 50 boluntario cu lo bin yuda na e diferente localidadnan pa hasi e actividad aki uno exitoso. Nos ta sumamente agradecido pa esaki y na tur nos sponsors cu ta haci e dia aki posibel.
E invitacion ta bay na henter e comunidad di Aruba pa bin y bishita e museonan. Sin boso lo no tin e museonan aki, tur artefacto tin su storia, cada museo tin su identidad. Pasa bishita nos, colabora cu nos, bin sostene loke ta di nos y bin festeha en grande.