Recientemente e miembronan di e Hunta di directiva di St. Fundacion Lotto Pa Deporte a sinta hunto cu e Comision di Hoben y Talentoso pa asina papia riba e prome lustro di e proyecto Hoben y Talentoso 2017.
Esaki lo ta e di cuater aña cu St. Fundacion Lotto Pa Deporte a forma parti di e proyecto cu ta reconoce e tremendo trabou desplega pa nos hobennan local den diferente area. E area di deporte ta esun mas grandi den e buki, alrededor di 15 hoben atleta di Aruba ta wordo reconoci pa nan prestacion y logro durante nan carera deportivo. Hunta di directiva di St. Fundacion Lotto Pa Deporte ta masha impresiona cu a proyecto desde su inicio y ta contento di por forma parti di un otro bunita proyecto pa e hubentud di Aruba. Ta importante pa sigui duna reconocimento y balor na nos hobennan cu ta destaca riba nan tereno y ta fungi como berdadero rolemodel pa henter nos comunicado specialmente pa nos hubentud. E bukinan di Hoben y Talentoso den algun aña lo bira parti di nos historia di Aruba. Aki binti aña tipo di bukinan asina ta masha valioso pa nos comunidad.
A papia tambe di e EXPO Hoben y Talentoso y meta tras di expone esaki na nos scolnan basico y avansa na Aruba. Ta importante pa nos alumnonan di scol cera conoci cu e hobennan cu a destaca riba varios tereno y cu a wordo reconoci pa nan talento y meritonan. Aruba conoce hopi hoben cu ta traha duro pa bay dilanti, cu ta ehempel y inspiracion pa otronan, pa cual motibo nan merece di wordo poni den luz positivo. Nos alumnonan ta haya e extra motivacion y lo bira determina pa logra cualkier meta poni den bida, sea ta den e area di educacion, deporte, educacion, innovacion, musica, cultura, arte y formacion social. Esaki ta lo di cinco edicion di e proyecto pa nos hobennan di Aruba, un vision cu a inicia cinco aña pasa bou iniciativa di Prome Minister di Aruba, Sr. Mike Eman.
St. Fundacion Lotto Pa Deporte ta masha orguyoso di por sigui brinda e sosten na e bunita trabou desplega pa e Comision Hoben y Talentoso, esaki na bienestar di nos hobennan di Aruba. Lotto, e loteria di Aruba ta bay haci su esfuerso pa haya mas sponsor den sector priva pa asina nan tambe por aporta financieramente na e prome lustro di e joya di proyecto aki.