Recientemente Fundacion Lotto pa Deporte a firma un contract di huur cu e organisacion encarga cu Carnaval na Aruba esta SMAC. Manera ta conoci, e organisacion SMAC ya pa dos aña ta haci uso di e facilidad di Aruba Entertainment Center na Dakota cu ta cay bou maneho di Fundacion Lotto Pa Deporte. Ambos instituto ta hunga un rol importante pa engrandece e exito di nos Carnaval.
Presidente diFundacion Lotto Pa Deporte, sr. Di Stefano Wernet, RA: “ Lotto ta masha contento di por contribui cu loke ta parti di nos cultura, esta Carnaval y pa e motibo aki tambe cu satisfaccion ta yega na un compresion mutuo di contract cu Stichting SMAC”. Apesar di ta hopi ocupa, Presidente di SMAC, sra. Shannon Henriquez a bisa cu SMAC ta hopi contento cu e ayudo ofreci di parti di Lotto y tin sigur cu den futuro cercano lo sigui haya e mesun cooperacion.
Pa dos aña caba un total di cinco evento carnavalesco organisa door di SMAC ta wordo teni den Aruba Entertainment Center cual nan ta e Eleccion di Prins cu Pancho, Tumberito Festival, Eleccion di Reina Infantil y Hubenil, Tumba Contest y e Eleccion di Reina Grandi.
Riba e foto nos por aprecia e momento di firmamento di e contract door di Presidente diFundacion Lotto Pa Deporte, sr. Di Stefano Wernet, RA hunto cu Presidente di SMAC, sra. Shannon Henriquez como tambe miembronan di e hunta di directiva di Fundacion Lotto Pa Deporte, sr. Elias Kock y sr. Silvio Janga.