Dia di 11 di Maart proximo, Fundacion Lanta Papiamento lo tene un dia di dictado nacional. Sra. Etlien Croes a amplia mas ariba esaki.
Fundacion Lanta Papiamento tin como meta pa conscientisa e pueblo di Aruba cu papiamento ta e lenga materno di mayoria habitante di Aruba y tambe e ta e idioma oficial, banda di Hulandes. Esaki como idioma oficial, e ta nifica cu como habitante, of persona bibando na Aruba, bo por manda un carta oficial sea carta di solicitud of di keho, sea na gobierno of otro instancia. Pa e carta haya balor e mester ta den un bon ortografia y gramaticalmente bon structura. Pa stimula skirbimento ortografico bon, Fundacion lanta Papiamento ta organisa un dictado nacional.
Sra. Croes ta di opinion cu tur desaroyo mester tin un team su tras. Esey kiermen cu e pueblo mester uni pa uza e papiamento corectamente. Kisas banda di gobierno tambe, stimula cursonan den cada bario. Fundacion Lanta Papiamento tambe lo cuminsa cu curso, pero esey ta bay ta un proceso. Pueblo mester ta consciente cu bo lenga materno, ta parti di bo. Y pa e tin su balor, mester uz’e manera cu e mester ta.
Papiamento ta wordo duna na MAVO, HAVO y Papiamento. E no ta wordo duna den scolnan basico, tambe tin ex studiantenan cu a bay studia afo y bin bek traha na Aruba. Hopi di esakinan no a haya e oportunidad di pa sigui un curso di Papiamento. P’esey mes, Sra. Croes ta enfatisa cu union ta haci forsa. Gobierno mester duna oportunidad na tur habitante pa nan sigui un curso pa domina e lenga miho. Segun Sra. Croes, scolnan basico cu no ta duna Papiamento.
Ta solamente dos scol na Aruba ta duna les di Papiamento, cual ta Colegio Conrado Coronel y Colegio San Hose, como proyecto piloto. Segun UNESCO, tur mucha tin derecho di siña otro idiomanan a base di su lenga materno, manera cu e ta aworaki na e dos scolnan aki. A base di e mucha su lenga materno, Papiamento, nan ta haya Hulandes, Ingles y Spaño.