Fundacion Lanta Papiamento a celebra exitosamente Dia Internacional di Idioma Materno cu un conferencia virtual

E aña aki Fundacion Lanta Papiamento a scoge pa organisa un seminario virtual cu e topico “E balor di nos Papiamento”. FLP a ricibi hopi reaccion positivo tanto local como internacional di e publico grandi cu dia 21 di februari a sigui e programa for di nan cas via computer of Diario TV.
E programa varia a cuminsa cu un charla di presidente di e fundacion señor Eduard Pieters, cu a enfoca riba e balor grandi di uzo di idioma materno Papiamento den enseñansa, pa desaroyo optimal di e ser humano y pa cumpli cu derecho di e mucha Arubiano. FLP ta boga pa, a base di enseñansa na Papiamento, e mucha siña papia, scucha, lesa y skirbi den un contexto di scol multilingual.
E di dos orado, señor Gershwin Lee, director di Colegio San Antonio (enseñansa avansa) a conta di su experiencia positivo cu e grupo di alumno cu a bin di Proyecto Scol Multilingual, basa riba dato acumula di 2 aña. Su relato a haya hopi atencion di mayor, docente y publico en general, specialmente pa e echo cu e alumnonan aki ta sobresali riba diferente tereno compara cu esnan cu a atende scol tradicional na Hulandes. E charla ta riba e pagina di facebook di FLP.
Drs. Merlynne Williams a duna un splicacion den un forma simbolico di kico SAM, Scol Arubiano Multilingual ta encera y e bentahanan cu e lo trece pa siñamento y desaroyo di nos muchanan. Señora Williams a haci uzo di dos metafora. Nos parha nacional prikichi como mascota di SAM ta representa e potencial di nos muchanan. Nos idioma Papiamento ta representa pa medio di nos fruta nativo shimarucu, rico na vitamina C, gusta, dushi y cu ta keda nace di nobo.
Cu e presentacion di e accesibilidad di buki educativo, literatura infantil, adulto y academico, tanto inprimi como on line na Departamento di Enseñansa y Biblioteca Nacional Aruba, a desbarata e mito existente cu no tin suficiente material na Papiamento. Banda di e charlanan publico por a disfruta di poema cu muchanan di scol multilingual Colegio San Hose a presenta y tambe por a mira y scucha e alumnonan di klas 6 tuma parti na un debate na Papiamento. No a falta musica na Papiamento di artista Arubiano hunto cu artista di nos islanan ruman Boneiro y Corsou.
E sesion di Haiku, presenta y guia pa dr. Joyce Pereira a inspira esnan cu tawata sigui e programa pa traha nan mesun haiku, cu ta un poema cortico di tres liña (di 5-7-5 silaba). Te ainda FLP ta ricibi haiku di participante. Ata un haiku cu a drenta dia di e celebracion:
Danki na nos tur
Cu ta papi’e y stim’e
Papiamento t’ey!

Comments

comments