Fundacion pa Hende Muhe den Dificultad (FHMD) cu hopi añas tras di lomba di trabou den nos comunidad, luchando contra Violencia Domestico, ta agredecido cu e compromiso di PG van Dam y Ministerio Publico.
Ainda nos ta corda con tres aña pasa Fundacion pa Hende Muhe den Dificultad (FHMD), representa pa su coordinadora y su voorzitter, Sra. Magaly Maduro y Sra. Suzette Kock respectivamente, a hasi un bishita di cortesia cerca Procureur-Generaal Sr. van Dam. E tawata un combersation ameno y nos a ripara cu e tema di Violencia Domestico tawata algo cu tawata biba fuerta cerca e PG aki.
For di e combersacion a sali dos promesa. Cu e kier bin cu un ‘veiligheidshuis’ den cual lo purba di atende mas hopi hoben y famianan cu risico di violencia of crimen prome cu awa pasa hariña, y cu e lo traha riba un ‘richtlijn/aanwijzing’ pa cu Violencia Domestico.
FHMD tawata impresiona cu Sr. van Dam a durf di hasi promesanan cu no ta solamente depende riba dje pa realisa.
Den november di 2017, durante di e 1er Conferencia riba Violencia Domestico di Aruba den Reino, Sr. van Dam un biaha mas públicamente a compromete su mes cu e Fundacion cu e lucha contra Violencia Domestico.
FHMD ta elogia PG van Dam kende a firma siman pasa a fimra un Instruccion nobo pa ora tin casonan di violencia den relacion.
E Instruccion aki ta contene reglanan pa investigacion y persecucion ora di violencia relacional. Tambe e ta encera e condicionnan basico pa loke ta trata e cooperacion entre Polis, Ministerio Publico, Reclassering y otro partnernan den e sector social y di cuido, cualnan ta traha hunto den e ‘Veiligheidshuis’.
Meta tras di e Instruccion aki ta pa crea un mihor aporte na trabao mas efectivo y eficiente di tur e partnernan concerni, como reaccion riba violencia relacional.
Ademas e Instruccion ta sirbi como herment pa mihor reconoce violencia den relacion, pa stop violencia of stop cu e menaza di violencia, y garantiza seguridad di victimanan.
Pesey Fundacion ta sumamente agradecido na Sr. van Dam cu e no a lubida su compromiso, no solamente cu Fundacion pero cu tur victima di Violencia Domestico. No tin palabra suficiente pa gradeci e iniciativa aki di parti di Ministerio Publico y di PG van Dam cu ta demostra nan motivacion pa e ehecucion di e Instruccion aki.
Un biaha mas, Masha Danki Sr. van Dam. You are a man of your Word!