Den un encuentro di prensa, Fundacion Hende Muhe den Dificultad, a duna un relato di con e aña a bay, cu nan clientenan.
Sra. Magaly Maduro, coordinado na Fundacion Hende Muhe den Dificultad, a splica cu a yuda 144 cliente. A yuda 44 dama pa un luga di keda y entre 25 pa 30 menor di edad, cu a bin hunto cu nan mama, den nan shelter. E aña 2019 a cuminsa y e fundacion ta hopi consciente di e necesidad di duna mas informacion pa nan sigui informa, pa nan sigui cu e conscientisacion pa e pueblo pa cu violencia domestico.
E aña aki, e fundacion a start cu’n campaña pa cu Dia di San Valentin, y pa Carnaval tambe lo bin cu’n campaña. Na maart nan lo bin cu’n actividad grandi, esta Runway Diva, cu ta bay en conhunto cu’n otro fundacion.
VALENTINE’S DAY
Mirando e temporada di San Valentin y tambe hunto cu e temporada di Carnaval, tin hopi informacion cual e fundacion kier trece dilanti. E fundacion ta hopi activo ariba rednan social y pa e temporada di Valentine’s nan a bin cu e campaña ‘imagen’. Riba rednan social por wak potretnan bunita, famia feliz, pero niun hende no sa kico ta pasa tras di e porta cera.
Tin maltrato, tin mucha, parehanan cu ta mustra bunita, pero tras di esaki no tin nada bunita. Mester conscientisa e comunidad, mirando cu ta den un temporada bunita, pero mester keda alerta ariba kico ta violencia domestico. Y por ta cada un di nos por cuminsa para keto, ariba ki sorto di relacion tin. Esaki ta un di e proyectonan di e fundacion pa e aña aki, segun Sra. Maria Carrasquilla.