Rapport cu Fundacion Gobernacion di Calidad Aruba ya caba a publica te cu awo dos rapport. Uno ta tocante maneho di personal durante 30 aña y e otro administracion financiero durante 30 aña. Sr. Armand Hessels di Fundacion Gobernacion di Calidad Aruba ta amplia riba esaki.
Esaki ta algo unico cu e fundacion a haci, cual ta publica tur e rapportnan cu a keda publica den historia di Aruba. Sea ta pa conseho di consulta, Controlaria General, IMF, SER., tur e instancianan cu a yega di produci un rapport, a wordo poni bou di otro y a saca e puntonan mas importante, dus puntonan cu realmente a destaca. Asina hende cu no ta lesa tur e rapportnan, ta haya un bista den un paar di pagina. Esun di personal ta conta cu 40 pagina solamente. Esun cu administracion financiero ta conta cu algo mas di 100 pagina.
Esun cu tuma e tempo pa lesa, ta haya 30 aña di historia di maneho di dos partido grandi di Aruba, MEP y AVP, con nan a hiba e gobernacion di Aruba. E conclusion ta devastador. Ta haya un bista cu nan a viola masha hopi ley. No solamente, riba entregamento di presupuesto laat, manera ta pasa tur aña. Tambe a pone cu e dos partidonan aki a viola mas ley cu tin atraco na Aruba pa aña.
Nombracion personal mes, ta un punto unda un cantidad di cos a tuma luga contra di ley. Bo mester puntra bo mes, si esaki ta e gobierno cu mester duna e bon ehempel di sigui ley na Aruba. Pero e contesta ta net lo contrario. Esunnan cu mas a kibra ley ta e gobernantenan. Y esunnan cu a wordo eligi pa controla gobierno, dus Parlamento, ta laga di haci nan trabao di controla e presupuestonan. Pero despues cu gobernantenan a caba di haci uzo ilegal di placa, nan ta bin legalisa esaki cu forsa retroactivo. E sistema democratico na Aruba no ta funciona.
Diferente partidonan politiconan a abusa di e poder cu nan a eherce y for di eynan por saca e conclusion, segun Sr. Hessels, cu e eleccion aki no ta bay trece mucho cambio den esaki. Si wak con partidonan politico ta haci como sifuera nada a pasa, y e situacion no solamente a empeora pero no ta wak ningun reflexion di niun di dos partido, mester bin un cambio den e manera di hiba politica. E partidonan politico lo no trece cambionan cu lo ta beneficioso pa comunidad.
For di 1986, tempo cu e prome rapportnan a cuminsa sali, e unico problema grandi cu tabata tin ta cu no tin niun instancia na Aruba cu tin e cifranan completo y e fundacion mester a busca na diferente instancia y traha un bista total di aumento di personal durante aña. Y ta wak cu continuamente ta tuma luga. E aumento di personal contra di tur conseho contra tur instancia. Nan a duna tambe di conoce, cuanto esaki ta perhudica Aruba, no solamente ariba tereno economico, pero tambe financiero.
Esey ta forma e problema na Aruba na e momentonan aki: e gasto di personal ta un presion asina grandi ariba presupuesto, cu por lo pronto no por papia di Finanza publico duradero. Cu otro palabra e situacion na Aruba, por lo pronto lo no conoce un cambio significativo. Esaki segun Sr. Armand Hessels, di Fundacion Gobernacion di Calidad Aruba.