Miembronan di Fundacion Epilepsia Aruba tur aña ta scoge un kleuterschool pa bishita riba Dia Mundial di Epilepsia y conmemora “Purple Day” hunto cu e muchanan. Purple Day ta un iniciativa di un mucha muhe di Canada, esta Meghan Cassidy, kende tempo e tabatin 9 aña a dicidi di dedica un dia na e condicion epilepsia den su comunidad. E iniciativa a sigui crece, el a plama rond Canada, Merca y henter mundo.
Na Aruba, segun Robert Nieuw, Presidente di e fundacion local, ta splica, cu e aña aki tabata na turno Rayo di Solo Kleuterschool na San Nicolas. E evento special a tuma luga un dia prome como cu e aña aki e fecha a cay den fin di siman.
Ademas di Purple Day, Fundacion Epilepsia Aruba tin tambe dos persona cu ta bishita scolnan y ta comparti informacion tocante di e epilepsia. Nieuw ta agrega cu Chichi y Mamarila ta activo durante di henter aña cu e programa di conscientisacion y por tuma contacto cu e fundacion pa haci un afspraak pa nan duna e presentacionnan.
Ta importante pa tin informacion di epilepsia den comunidad, pa tur hende sa kico ta epilepsia, pero tambe pa esun cu tin e condicion aki sa cu e no ta su so, esaki tabata e base di e hoben Meghan su iniciativa y ta loke ta e fundeshi tambe pa e actividadnan mundial.
Na Aruba a celebra Purple Day cu un show chikito di parti di e muchanan di Rayo di Solo, nan a haya un treat di cupcake y despues a laga blaasnan color biña bay laira den presencia di Minister di Enseñansa, Michelle Hooyboer-Winklaar.