Bario di Sero Crystal un biaha mas ta den noticia, ya cu ta parce cu nada a cambia, pa loke ta actividad industrial den e bario. Sra. Hilde Rodriguez- Taekema, di Fundacion Conserva Seroe Crystal, ta amplia.
Fundacion Conserva Seroe Crystal a haya ta necesario pa trece nan preocupacionnan padilanti un biaha mas. Mas trempan den aña, e fundacion tabata tin bon contacto cu e minister di Medio Ambiente y e minister di Husticia, pa loke ta e procedura tin pa loke ta nan permisonan. Despues a bira basta keto, y mientras tanto e ultimo simannan, e actividadnan industrial den e area a intensifica. Ta material cu ta wordo entrega den e areanan, heavy equipment ta keda traha te ora cu bira scur. Ta wak varios truck chikito, dia aden, dia afo cu santo y grijs, y ta di lamenta cu e minister di Husticia no por duna e fundacion e informacion di e status di e permisonan necesario.
Por lo tanto, e fundacion tin algun pregunta pa ambos minister, y ta haci esaki publicamente, ya cu nan no a haya chens di haci esaki personalmente. E ministernan mester duna un contesta specifico, ya cu cada rato, e contesta ta, cu nan ta bezig cu’n maneho pa termino largo y ta purba pa laga e companianan muda. Pero esey no ta riparabel, ya cu mas y mas nan ta wordo invadi cu mas y mas actividad, cual ta dificil di acepta. P’esey e preguntanan na minister.
Sra. Rodriquez- Taekeman a sigui bisa cu segun ley si tin permiso otorga y e habitantenan di e bario a entrega un bezwaarschrif, cual mester avisa e habitantenan. Pero mientras tanto, e trucknan ta sigui core. E fundacion no tin nada contra di niun compania. Nan ta pidi claridad na minister, y transparencia. Esey ta loke cu nos gobernantenan a propone y promove, pero mientras tanto, e fundacion no ta tendiendo nada di nan.
Kisas si nan no tende nada di gobernantenan, nan lo evalua pa hiba e caso corte, segun Sra. Rodriguez- Taekema, di Fundacion Conserva Seroe Crystal.