E competencia di pelicula cortico ‘Shortcutz Aruba’ y cine den aire liber ‘Rooftop Film Club’ ta yega Aruba na Juli.
Fundacion CINEARUBA a obtene e derechonan pa trece Aruba e network di cine cortico mas grandi di Europa ‘Shortcutz Network’. Despues di Portugal, Alemania, Hulanda, Brazil ta toca turno Aruba. Shortcutz Aruba ta forma parti di e network aki cu ta un plataforma di cine internacional. E version di Aruba lo ta identico na e shortcutznan internacional cu ta consisti di presentacionnan special di peliculanan di e otro shortcutznan. Pa cual e peliculanan di Aruba su talentonan local tambe lo ricibi e mes un oportunidad di por yega na e publico internacional pa medio di e network. Shortcutz Aruba lo ta tur prome diabierna di luna na Academy of Fine Arts and Design Aruba, portanan lo habri pa 6’or y e programa lo inicia pa 7’or. Ademas di presentacion di peliculanan cortico di e network tambe lo tin un competencia di peliculanan cortico realisa na Aruba of realisa pa talentonan local den exterior. Cada luna lo tin un ganador di luna cu lo sigui pa e gran final cu lo ta na januari 2018 unda cu pa medio di un gala award lo entrega premionan den 12 categoria entre otro miho pelicula, miho actor y miho actriz.
Shortcutz Aruba ta conta cu un team di hurado internacional cu lo huzga cada pelicula. E team di hurado ta consisti di e actor y cineasta Ben Steel di Australia, e actriz Nathalie Biermanns residencia na Los Angeles, e actor Christian Serritiello di Inglatera, e actriz Mariel Cejas di Cuba, e cineasta Sean Hodgkinson di Trinidad & Tobago, e actor Leonardo Castro di Puerto Rico, e mesclado di sonido Gabriel Bocanegra di Colombia, e cinematografo Luis Cesar Izquierdo di Spaña y e cineasta German Gruber Jr. di Curacao.
Durante cada sesion lo tin invitadonan special cu lo papia over di nan peliculanan y lo duna algun tips na e talentonan emergente. Shortcutz Aruba tambe lo ofrece tayernan tocante con pa traha pelicula pa yuda esnan cu kier participa traha nan peliculanan miho posibel.
Diabierna 7 di juli tin e prome sesion cu un presentacion di peliculanan cortico di e otro shortcutznan. Lo presenta e pelicula ganador di Shortcutz Amsterdam ‘NYMPHET’ di e director Laura Hermanides. Tambe lo presenta otro dos pelicula cortico di Shortcutz Santa Catarina titula ‘Saturnica’ di Cesar Netto y ‘Espelho’ di Juliana Milheiro, e dos peliculanan aki ta na Portugues pero nan tin subtitulo na Ingles.
Pa esnan cu ta desea di entrega nan pelicula cortico pa participa por haci esaki prome cu 15 di juli. Tur luna por entrega pelicula pa por participa. E peliculanan mester ta minimo 5 minuut y maximo 15 minuut. E pelicula no mag di ta mas cu 2 aña bieu y si e no ta na Ingles e mester tin subtitulo na Ingles, esaki ta importante door cu e pelicula lo por bay internacional na e otro Shortcutznan. Participacion ta habri pa localnan y Arubianonan residencia den exterior. No ta cobra pa entre pelicula y por haci esaki na www.cinearuba.com/submissions. Shortcutz Aruba ta un evento pa personanan di 18 aña bay ariba. Entrada na e prome sesion ta completamente gratis. Shortcutz Aruba ta posibel danki na e apoyo di Fonds voor Cultuurparticipatie, Prins Bernhard Cultuurfonds Caribisch Gebied, VNO, RBC Royal Bank, Culturaruba.com y Academy of Fine Arts and Design Aruba.
Diadomingo 9 di juli lo tin e presentacion di un otro evento innovativo di cine di fundacion CINEARUBA; ‘Rooftop Film Club’ cu ta basicamente un Cinema Riba Dak cu ta ofrece un experiencia cinematico den aire liber bao di tur e streanan. E publico por disfruta di e bahada di solo den un ambiente ‘cozy’ pa despues disfruta di un pelicula artistico of regional den un ambiente urbano den centro di ciudad.
E ‘Rooftop Film Club’ lo ta tur di dos diadomingo di luna y e lo ta na Academy of Fine Arts and Design situa na Ooststraat 2. E portanan lo habri for di 6’or di atardi y e pelicula lo inicia pa 7’or di anochi. Tur luna lo tin un pelicula cu no ta yega nunca den salanan di cine local. E lista pa e aña aki ta conisisti di Art Connect for di Trinidad & Tobago, Distancia for di Guatemala, Trafficked for di Trinidad & Tobago y Una Noche for di Cuba.
E prome presentacion lo ta completamente gratis, di cual e publico lo por disfruta un biaha mas di e pelicula ‘Abo So’. Pa mas informacion por bishita e pagina web www.cinearuba.com/rooftopfilmclub. Rooftop Film Club ta posibel danki na e apoyo di Academy of Fine Arts and Design Aruba.