Diasabra awor Aruba su prome pelicula largo y musical ta yega Youtube. Desde su primicia el a causa furor logrando dos premio pa miho pelicula y presentacionnan internacional entre otro na Washington DC, Toronto y Italia. Abo So tabata e prome nominado di Aruba pa un ‘Yellow Robin Award’ di Curaçao International Film Festival Rotterdam.
Ademas di showcase Aruba su cultura internacionalmente, Abo So a causa un impacto den comunidad y den e sector creativo. Cu un concepto fresco Abo So a resucita cancionnan di pasado y a hincanan den un bachi contemporaneo cual a wordo gusta bao di e hobennan y a inspira otro proyectonan manera Resona.
Abo So ta e prome pelicula local cu a haya un ‘theatrical release’ den salanan di cine local y tabata ‘sold out’ diesseis biaha tras di otro. Pa prome biaha comunidad por a bishita un teatro di cine pa disfruta di un pelicula local y full na Papiamento.
Abo So a duna inicio na un era nobo di peliculanan local pa cine. Abo So a inspira y motiva otronan pa tambe crea produccionnan di cine local. E pelicula cu a celebra Padu y su cancionnan a converti den un instrumento di inspiracion y motivacion. Su creador Juan Francisco Pardo a skirbi e storia cu e intencion pa comunidad completo difsfruta di Aruba su cultura, pa sinti orguyoso di nos propio cultura, balora y aprecia loke ta di nos. Tambe e storia ta trata e tema di convivencia, hermandad, pasobra hunto nos tur ta haci Aruba e ‘One Happy Island’.
Abo So no tabata posibel sin e actornan, e ekipo humano, e sponsornan y prensa cu a sa di apoya e proyecto aki. E pelicula lo ta disponibel gratis, sin costo y e ta accesibel via www.abosofilm.com of www.facebook.com/abosofilm.