Tur aña fundacion CINEARUBA ta realisa diferente proyectonan multidisciplinario pa e comunidad di Aruba. Actual e fundacion ta preparando su siguiente proyecto pa 2019 y ta buscando ayudo di comunidad pa aloca fondo pa asina por ehecuta e proyecto.
E proyecto
Pa 2019 fundacion CINEARUBA kier bin cu un proyecto diferente na loke e fundacion ta custumbra di haci. CINEARUBA ta purbando di haci su proyectonan en bibo, eliminando e parti di post-produccion. E prome proyecto cu e formato nobo aki tabata Drama Den Aire unda cu ful un obra auditivo a wordo presenta ‘live’ riba Facebook. Pa juni 2019 tambe lo tin un presentacion ‘live’ door di e cayanan di San Nicolas unda cu hobennan, adultonan y 60 plus lo bay presenta e historia di San Nicolas den forma di un musical cu cacionnan cu nan mes lo crea. E proyecto ta yama Street Rap Musical y e intencion ta pa cada hoben trece un famia cu por ta su mama, tata, tanta, omo, welo of wela pa cohunto nan crea canticanan over di San Nicolas cu nan lo rap durante e presentacion pa comunidad di San Nicolas y Aruba completo. E proyecto lo consisti di tayernan unda cu e participantenan lo siña skirbi letra, compone musica, canta y graba canticanan. E concemento di e adultonan encuanto e historia di San Nicolas lo por ta e base pa cada cantica. A kies pa San Nicolas door cu San Nicolas ta rico na historia y cultura, pero tambe door cu CINEARUBA kier brinda na e hobennan di San Nicolas un plataforma pa nan por expresa nan mes.
E meta
E meta di e proyecto ta pa trece e comunidad mas cerca di otro y fortalece e contacto entre hoben cu adulto, 60 plus, famia y hendenan di bario. Na mes un momento e proyecto lo stimula herencia inmaterial bao di e hobennan door di traspasa historia di famianan e generacion nobo.
Con comunidad por yuda
Actualmente fundacion CINEARUBA tin un peticion activo riba e plataforma di ‘Jij Maakt Het Mee’ di Fonds voor Cultuurparticipatie di Hulanda. Pa CINEARUBA por ricibi e subsidio pa por ehecuta e proyecto di Street Rap Musical, e fundacion tin cu logra haya 100 voto for di publico. Esaki ta mas bien un forma pa midi e interes di e publico. CINEARUBA ta buscando 50 voto ainda pa por completa e 100 votonan necesario. Tur persona cu un email of un cuenta di Facebook, of Twitter por vota.
Por ‘login’ cu un cuenta di Facebook of por registra pa vota cu un cuenta di email, e proceso aki ta importante door cu e lo haci cada voto valido. Pa un guia con pa vota y pa e link pa vota por bishita e pagina di Facebook di CINEARUBA cu ta fb.me/cinearuba.