Dia 18 di maart Aruba henter ta celebra Dia di Himno y Bandera. Dos simbolo di nos autonomia, identidad, libertad y union.
48 aña pasa nos a hisa nos bandera y a canta nos himno pa prome biaha; pero for di semper, nos pais a briya cu luz propio, un luz cu no lo paga nunca. Un luz cu ta e muestra di e curashi y e pasion di nos hendenan pa Aruba.
Ariba e dia special aki, tambe nos ta corda ariba nos Status Aparte y aki nos tin cu bisa: Danki Betico pa haci realidad un gran soño di un pueblo luchado y balente.
Pa conmemora nos fecha nacional, Fundacion Betico Croes a realisa un tremendo actividad cu musica, danza, wega, cuminda y yen di actividadnan pa grandi y mucha. Multitud di hende a bishita Plaza Status Aparte Gilberto F. Croes pa asina comparti y demostra hunto e orguyo di ta Arubiano.
Tambe Fundacion Betico Croes a presenta su Bestuur nobo ariba e fecha special aki. E meta di e Fundacion ta pa sigui engrandece e nomber di Betico y pasa esaki di generacion pa generacion. E fundacion tin diferente plan cu actividadnan cultural y educativo pa nos pueblo, como tambe e embeyecemento di Plaza Status Aparte Gilberto F. Croes.
E bestuur nobo a keda conforma asina:
Presidente: Sr. Dennis Croes
Vice Presidente: Sr. Maikito Croes
Secretaria: Sra. Judith Werleman
Segundo Secretaria: Sra. Winnie Dirksz
Tesorero: Sr. Mirto Croes
Segundo Tesorero: Sra. Ebby Rasmijn
PR: Sra. Tatiana Eman
Comisario: Sr. Jeffrey Schuilenburg
Comisario: Sr. Chelito Dirksz
Comisario: Sra. Angelique Maduro
Comisario: Sra. Rosemin Croes
Ariba combinacion di potret por aprecia momentonan precioso cu a wordo comparti pa esnan cu a asisti, memei di un dushi ambiente cu a cuminsa for di 10’or di mainta te cu 6’or di atardi.
Fundacion Betico Croes ta yama pueblo di Aruba DANKI y ta bisa un y tur: Keda pendiente pa mas eventonan cultural cu lo sigui trece unidad pa nos pueblo, rond di actividadnan cu ta fortalece nos identidad.