Parada Cultural ta priminti di ta grandi e aña aki. Mester bisa si cu e ultimo añanan aki e actividad aki a bin ta creciendo cada aña. Sr. Chico Harms, di Comision Centro di Bario Brazil ta elabora ariba actividad aki.
Tur e reinanan cu a gana durante e actividad di Chikitin Cultural lo ta biahando proximamente pa Corsou, en conexion cu Dia di Seu. E aña aki nan lo ta biahando pa Corsou, mirando cu tur e candidatanan cu a sali reina aña pasa, a haya un pasashi gratis pa bay Fiesta di Seu na Corsou, na Banda Abao. Un grupo di mas o menos 120 persona lo ta biahando pa Corsou, como un solo Aruba, pa participa den e parada di Seu.
Pa temporada di Parada Cultural tin un grupo di Corsou cu ta bin pa asina participa na e evento aki. E mesun grupo aki ta esun cu ta yudando e comision pa cu nan biahe y estadia na Corsou.
Por ultimo Sr. Harms a gradici Fundacion Bernadina Grovell pa nan cooperacion cu nan ta duna Comision Centro di Bario Brazil.
Pa loke ta Fundacion Bernadina Grovell e aña aki nan lo tene nan Festival di Canto di e diferente canticanan di Bernadina. Sr. Percy Jeand’or, segundo presidente di Fundacion Bernadina Grovell, ta elabora e plannan cu e fundacion tin pa e aña aki.
E aña aki un biaha mas lo organisa e Festival di Canto di diferente cantica di Bernadina, di Bernadina cu Padu, di Bernadina cu su casa, Bernadina cu diferente otro cantante mas. Pero cualkier compositor por participa tambe. Sr. Jeand’or a haci un apelacion na e hubentud pa asina nan conoce mas di Bernadina, y tur loke el a logra tempo di su tempo, for di su hubentud. Bin participa na e festival di Fundacion Bernadina Grovell. Aunke cu Bernadina no t’ey mas, pero ta keda recorda tur loke el a logra den su carrera.
Cualkiera cu kier participa por inscribi na Centro di Bario Brazil, cerca Sr. Chico Harms, Sra. Lena Orman of cerca Sra. Lilian Besselink (Shi Preke) of cerca Sr. Percy Jeand’or mes.