Fundacion Autismo Aruba preparando pa Luna di April
Fundacion Autismo Aruba, FAA, pa prome biaha, ta tene un encuesta representativo pa midi e conocemento y conscientisacion riba Autism Spectrum Disorder, ASD.
A lansa e encuesta dia 20 di Maart, durante e April ta luna di Autismo y un biaha mas, FAA ta enfoca atencion special riba e trastorno, cu tambe ta conoci como Autism Spectrum Disorder, ASD.
A lansa e encuesta durante e Research Expo organisa pa Facultad di Arte y Ciencia, FAS. E expo tabata e momento apropia pa expone studiantenan di FAS na investigadonan. E investigacion di FAA ta den man di dos studiante di Coastal University Carolina Lizeth Alcantara y Matthew Eichenlaub cu ta den nan pasantia na FAA. Nan ta haya guia di miembro nobo di directiva Carolina Span.
E encuesta ta pa pone un base con familiar comunidad di Aruba ta cu ASD. E ta consisti di preguntanan relativamente simpel pa permiti mas hende contesta e preguntanan. Ademas, e ta un formato cu ta permiti comparacion cu otro paisnan. E datonan cu e encuesta lo produci, ta determina e maneho di FAA riba e tereno di conscientisacion en general, pero tambe di gruponan afecta en particular.
E encuesta ta digital y ta den idioma Ingles, mirando cu e studiantenan Mericano lo mester analisa e datonan aki. Ta invita comunidad riba 18 aña pa participa na e encuesta aki cu ta tuma dos a tres minuut maximo pa contesta. Tin cuater link, cu ta specificamente pa e diferente gruponan cu ta invita pa contesta e 10 preguntanan.
Nan ta:
• pa hende muhe entre 18 pa 45, https://www.surveymonkey.com/r/YXYCGSG;
• pa hende muhe di 46 of mas, https://www.surveymonkey.com/r/YXHZ6DX;
• pa hende homber entre 18 pa 45, https://www.surveymonkey.com/r/YNV77R2;
• pa hende homber di 46 of mas, https://www.surveymonkey.com/r/BFD6LR7
Motibo pakico tin cuater link pa e diferente categorianan, apesar cu ta e mesun preguntanan ta pa asina por haya mas dato y mas diferenciacion entre e gruponan posibel. Pues unabez cu un persona di cierto edad habri un link, ya caba investigadonan sa den cua grupo e ta cay.
E encuesta aki ta parti di diferente actividad cu FAA ta organisando pa luna di April cu ta luna di Autismo. Lo inicia e luna cu e tradicional Light it up Blue, dia 2 di April, cu ta Dia Mundial di Conscientisacion di Autismo y ta sigui cu e Blue Race dia 7 di April.
Lo tene comunidad informa riba e actividadnan aki.
Potret: Miembro di Fundacion Autismo Aruba Carolina Span, hunto cu studiantenan di Coastal University Carolina, Lizeth Alcantara y Matthew Eichenlaub.
Fundacion Autismo Aruba a lanta na 2005 cu e meta pa sostene personanan cu Autismo y nan famia, pa medio di campaña di conscientisacion, tayer pa mayor y docente, y actividad particularmente pa muchanan cu Autismo. E fundacion ta totalmente dependiente di donacion y ta constantemente en busca di miembronan pa fungi den directiva y como boluntario.
Pa mas informacion por tuma contacto cu FAA.
Email: [email protected].
Facebook: Fundacion Autismo Aruba.
Cuenta di Banco: rbc #7700000042769067